DILI,05 marsu 2024 (TATOLI)–Aban, Ró Seabourn Odyssey no Seabourn Sojourn tula turista sira mai Timor-Leste no atraka iha portu Dili hahú iha tuku 7:00 dadeer no tuku 18:00 lorokraik sei fila fali ba Kupang, Indonézia, Diretora Nasionál Marketing Turizmu Relasaun Internasionál, Ivania Ros Ximenes Gonçalves, informa.
“Foin primeira-vez ita-nia rai Timor-Leste ne’ebé mak hetan ró rua kedas mak tama iha loron ida deit ne’ebé sei atraka Dili iha tuku 7:00 dader to’o tuku 18:00 lokraik,”Ivania Ros Ximenes Gonçalves dehan, bainhira hala’o konferénsia Imprensa iha Sentru Informasaun Turístiku, Bidau Lecidere, ohin.
Diretora Ivania Ros, hateten, ró rua ne’e mai husi Austrália no sei liu fali ba Kupang, Indonézia.
“Ró ida naran Seabourn Sojourn ne’e tula pasajeiru hamutuk 355 ho nia Crew 335 nune’e ró ho naran Seabourn Odyssey lori pasajeiru hamtuk 390 ho nia Crew 354. Entaun totál pasajeiru sira ne’ebé mak mai ne’e ho ró ida hamutuk 450. Entaun, ho ró rua ne’e kuaze 1.000,” nia afirma.
Ezekutiva ne’e informa, vizitante sira ne’e mai nasaun oioin hodi mai vizita área turístiku Timor-Leste nian.
“Ita-nia vizitante sira ne’e mai husi nasaun Estadus Unidos Amerika, Austrália, Canada,Reinu Unido, Nova Zelándia, Alemaña, Austria, Xina, Indonézia, Singapura, Áfrika do Sul, Romania, Irlándia, Iceland, Switzerland, Bélgica no Nova Yorke,’” nia hato’o.
Diretora Nasionál Marketing Turizmu Relasaun Internasionál, Ivania Ros Ximenes Gonçalves, haktuir, husi sira-nia vizita ne’e sei hala’o atividade iha fatin turístiku importante sira iha Timor-Leste hanesan iha Dare Memorial, Gleno Ermera, sira ba vizita prosesu kafé nian, depois iha Dili laran ba iha Múzeu rezisténsia, Chega Muzeum, Timor Plaza, Tais Market, Semitériu Santa Kruz, Xanana Reading Room, Cristo Rei,Dolok oan no sira haris tasi oras rua hanesan ne fila fali mai.
“Espetativa Governu nian mak turista sira bele mai nafatin nune’e fó rendimentu ba ita-nia nasaun no mós fó rendimentu ba emprezáriu sira ne’ebé mak servisu iha área turizmu,” nia dehan.
Kona-ba preparasaun Governu liuhusi Ministériu Turizmu no Ambiente halo koordenasaun hamutuk ho Ministériu relevante liliu Polísia Nasionál Timor-Leste (PNTL), Ministériu Negósiu Estranjeiru no Kooperasaun (MNEK), Imigrasaun, Portu Dili, Diresaun Nasionál Marítima, Karantina, halo preparasaun hamutuk hodi fasilita emprezáriu Timór sira ne’ebé mak halo koordenasaun ho ró sira ne’ebé mak atu tama mai iha ne’e fasilita sira nune’e hatama mai ho konfortavel.
“Ami mós konvida emprezáriu timoroan sira atu fa’an sasán iha Portu Dili mak hanesan Tais market, Boneca Ataúro no Kafé Timór,” nia subliña.
Iha fatin hanesan, Portavoz Polísia Nasionál Timor-Leste (PNTL), Superintendente Polísia, António da Luz, informa, relasiona ho turista sira ne’ebé mak aban atu mai, husi parte seguransa iha ona koordenasaun di’ak ho parte Diresaun Turístiku nian oinsá mak bele asegura vizitante sira ne’e ho di’ak.
“Fatin sira ne’ebé mak ita-nia vizitante sira atu ba, ita sei koloka ita-nia seguransa oinsá, asegura ita-nia vizitante sira durante sira-nia estadia iha Timór liuliu iha kapitál Dili, sira bele seguru durante sira-nia atividade dadeer to’o lokraik,” António da Luz garante.
Nia informa, Polísia Tránzitu sei akompaña vizitante sira ba rute sira ne’ebé mak sira atu vizita ba no koloka seguransa ba iha fatin sira ne’ebé mak vizirante sira atu ba.
Notísia relevante:
Jornalista : Felicidade Ximenes
Editór: Rafael Ximenes de A. Belo
