VIQUEQUE, 04 marsu 2024 (TATOLI)- Kompañia Don Kame koopera ho empreza Caltech Engineer hodi rekolla lixu iha munisípiu Viqueque mai halo resiklajen ka transforma sai produtu útil iha Dili.
Empreza Don Kame hahú implementa atividade rekolla lixu iha 2016 no konsege konstrui armazein lixu ida ho kuartu tolu hodi akumula lixu no iha tinan 2023 empreza refere konstrui liseiru ka fatin lixu hamutuk unidade 15 iha suku Caraubalu atu fasilidade komunidade sira so’e hodi fasil halo resiklajen. Projetu rekolla lixu ne’e ho objetivu atu ambiente iha kapitál Viqueque laran sai moos no livre hosi fo’er.
“Dala barak ema haree lixu ne’e laiha valór, maibé hosi lixu ne’e iha valór ekonómiku di’ak bainhira halo resiklajen ka transforma ba produtu útil ne’ebé komunidade sira bele uza fali. Nune’e ami durante ne’e halibur lixu iha Viqueque ho tipu hanesan água mamuk no botir mamuk sira hodi distribui gratuita ba empeza Caltech hodi halo resiklajen ka transforma ba tripleks, kadeira, paving no seluk tan”, Pesoál Servisu iha Kompañia Don Kame, Armindo da Costa Soares, hateten ba Agência TATOLI, I.P, iha armazein lixu iha suku Caraubalu, ohin.
Projetu ne’e, Empreza Don Kame implementa tanba servisu hamutuk ho Ministériu Administrasaun Estatál (MAE) liuhosi autoridade munisipál no postu, xefe suku sira hodi rekolla rekolla lixu iha kapitál munisípiu Viqueque.
“Ami lori autoridade lokál sira-ne’e bá halo estudu komparativu iha nasaun Japaun hodi haree direta ema-nia ambiente no jestaun lixu nian. Atu implementa fila fali iha munisípiu Viqueque”, nia afirma.
Daudaun, funsionáriu kompañia Don Kame iha Viqueque kontinua halo sensibilizasaun kona-bá asegura ambiente saudavél ba ba abitante suku Caraubalu hodi so’e lixu iha fatin lixu ne’ebé prepara ona.
Empreza Don Kame mós distribui plástiku ba kada uma-kain sira hodi so’e lixu ba laran, hafoin ba so’e iha uma lixu sira.
Iha fatin ketak, Servisu Saúde Viqueque, Francisco de Carvalho, agradese ba kompañia Don Kame ne’ebé daudaun rekolla lixu iha munisípiu Viqueque tanba asaun ne’e pozitivu ba saúde públiku.
“Ami haree atividade ne’e pozitivu tebes tanba bele garante ambiente saudavél ba komunidade sira,” nia agradese.
Notísia relevante:Hadomi Timor-Leste labele so’e lixu arbiru
Jornalista : Vitorino Lopes da Costa
Editór : Florencio Miranda Ximenes
