DILI, 11 marsu 2024 (TATOLI) – Diretór Servisu Munisipál Jestaun Merkadu no Turismu Munisípiu Dili, Arthur Henriques, dehan Governu sei prepara fatin atu muda vendedór sira iha Antigu Merkadu Sengol Bidau Akadiruhun tanba fatin refere nu’udar espasu públiku ho objetivu atu uza hodi benifisia ba dezenvolvolvimentu sosiedade nian.
“Husu sira iha Aimutin ne’e, ami halo indeminizasuan ka lae, tanba ne’e ita hotu tenke koopera malu de’it, ami durante ne’e la halo indeminizasaun ruma tanba fatin ne’ebá espasu públiku, entaun Governu la presiza atu selu fali sira”, nia relata
Tanba ne’e, nia husu ba vendedór sira iha Sengol Bidau atu koopera, hodi dezenvolvimentu nasaun ne’e bele la’o ba oin, Governu la tau osan atu selu vendedór sira.
“Sira aimutin, ami muda ona semana oin, ami-nia ekipa tun atu hala’o servisu ida-ne’e, tanba fatin ne’eba espasu públiku, tuir Dekretu Lei númeru 33/2008 iha alterasuan dahuluk ba dekretu lei númeru 13/2024, define ona katak bainhira sira hakarak mantein mak Governu tun imediata” Arthur Henriques informa.
Aleinde ne’e, Vendedór Antigo Merkadu Sengol Bidau Akadiru-hun husu ba Governu atu prepara fatin ho dignu no apropriadu molok muda sira.
“Ami husu ba Sekretáriu Estadu Toponimia no Organizasaun Urbana, presiza halo koordenasaun di’ak ho Ministériu Komérsiu Indústria no Autoridade Munisípiu Dili inklui rona ami vendedór sira-nia lian hodi prepara fatin dignu no apropriadu ba ami vendedór sira molok muda ami”, Portavoz Imaculada Afoan, informa bainhira hala’o konferénsia imprensa iha Antigu Merkadu Sengol Bidau Akadiruhun, foin lais.
Vendedór sira husu ba parte kompetente atu bele reativa fila fali merkadu Bekora ho atu bele muda sira ba iha ne’eba atu halo negósiu.
Xefe Suku Bidau Sanatana, Alexandrino Mesquita da Costa, informa fatin areadór iha Sengol Bidau Akadiruhun hola parte iha Suku Akadiruhun, maibé komunidade sira maioria mai husi Bidau Santana hodi venda iha ne’e.
“Ha’u nia hanoin fatin ida-ne’e ema hotu hatene katak ida-ne’e merkadu Sengol Bidau, entaun sira konvida ha’u hanesan autoridade lokál atu mai iha ne’e hodi rona sira-nia preokupasaun sira ne’ebé hato’o ba Sekretáriu Estadu Toponomia katak sira-nia objetivu mak tenke kria kondisaun ba sira, tanba sira prontu koopera ho estadu atu muda ba ne’ebé de’it maibé kondisaun tenke favoravel ba sira”, Alexandrino Mesquita da Costa esplika.
Autoridade lokál ne’e mós afirma katak durante ne’e kipa husi SEATOU aviza ona atu muda sira maibé, Governu seidauk iha indemizasaun ruma ba vendór sira iha área Sengol Bidau.
Vendedór sira iha Antigu Merkadu Sengol Bidau Akaduruhun, hamutuk besik 100 inklui uma privadu.
Jornalista : Felicidade Ximenes
Editór : Zezito Silva
