DILI, 11 marsu 2024 (TATOLI)—Prezidente Institutu Nasionál Formasaun Dosente no Profisionál Edukasaun Timor-Leste (INFORDEPE), Domingos Martins, hateten profesór hosi Brazileiru hamutuk 12 sei to’o iha Timor-Leste fulan-jullu hodi fó formasaun ba profesór Eskola Ensinu Sekundáriu Tékniku Vokasionál (ESTV) iha Timor-Leste.
“Formasaun ESTV nian ne’e, profesór brazileiru 12 ne’ebé sei mai iha fulan-fulan 2024. Nune’e iha loron 05 agostu to’o iha 15 dezembru 2024, ne’e hahú implementa ona,” Prezidente INFORDEPE ne’e hateten ba Agência Tatoli, ne’ebé partisipa The Best Project Steering Committe Meeting, iha salaun Maubara Room, Timor Plaza, segunda ne’e.
Iha projetu pilotu ne’e, profesór Brazileiru 12 ne’e sei fó formasaun ba profesór ESTV iha munisípiu Ermera, Covalima, Dili no Baucau, ne’ebá sei foka liubá área produtivu ESTV nian ba profesór ne’ebé hanorin iha ESTV ne’e.
“Eskola ne’ebé ami identifika hanesan iha Covalima mak Akar-Laran, Cristal, ESTV ida iha Zumalai no ESTV iha ih Fohorem. Ba munisípiu Ermera ne’e iha ESTV iha Railaco no ida iha Gleno hanesan mós iha Baucau no Dili,” nia hateten.
Daudaun ne’e, Ministériu Edukasaun liuhosi INFORDEPE halo hela levantamentu ba dadus profesór hosi munisípiu haat ne’e, no programa ida-ne’e hanesan pilotu ne’ebé sei implementa uluk iha munisípiu haat depois alarga ba seluk.
Kona-ba osan, Prezidente INFORDEPE hateten, programa ne’e osan fahe ba rua mak ida Governu Timor-Leste mak responsabiliza mak ba kustu akomodasaun nian no hanesan mós subsídiu komplementár ida ba profesór Brazileiru 12, hosi Governu Brazil nian mak ba viajen ba-mai nian inklui osan ba saúde.
Jornalista : Osória Marques
Editór : Cancio Ximenes
