SERVE Covalima kontribui $2.843 ba kofre Estadu

COVALIMA, 11  marsu  2024 (TATOLI) – Servisu Rejistrasaun no Verifikasaun Emprezariál (SERVE, I.P) munisípiu Covalima arrekada, husi janeiru to’o 11 marsu, reseita hamutuk $2.843 ba kofre Estadu.

Koordenadór SERVE I.P sukursál Covalima, Pedro Domingos dos Santos, hatete reseita ne’e mai husi sidadaun sira halo rejistu komersiál foun hamutuk 47, halo renovasaun ba dokumentu 81 no halo alterasaun hodi aumenta atividade hamutuk 15.

SERVE Covalima daudaun iha de’it funsionáriu na’in-tolu mak hala’o sira-nian knaar mak hanesan koordenadór, pesoál iha área atendimentu no iha arkivu hodi hala’o serbisu multifunsaun, ne’ebé kada loron atende ema na’in-ualu to’o 10 de’it.

Antes ne’e, funsionáriu ne’ebé serbisu iha SERVE Covalima hamutuk 12, husi totál ne’e na’in-tolu mak sei ativa, tanba pesoál administrasaun, funsionáriu IT, responsavel ba baze dadus no pesoál limpeza nia kontratu termina.

Iha 2023, SERVE arrekada ona reseita hamutuk $14.812 ba kofre Estadu ne’ebé mai husi halo rejistu foun hamutuk 225, halo alterasaun ba dokumentu 83 no renovasaun 444.

Notísia relevante: Funsionáriu na’in-tolu de’it difikulta atendimentu rejistu emprezariál iha Covalima

Jornalista: Celestina Teles

Editora: Maria Auxiliadora