COVALIMA, 14 marsu 2024 (TATOLI) – Covalima komemora, ohin, Loron nternasional Feto ne’ebé monu iha 08 marsu hodi hala’o atividade marsa saudavel ho akompaña deklarasaun Hatete la’e ba kaben sedu, se kaben sedu risku ba biolénsia. Ami feto hakarak livre. Ami feto iha direitu ne’ebé hanesan ho mane sira. Mai ita hamutuk promove igualdade jéneru.
Tanba ne’e, reprezentante Prezidente Autoridade Munisípiu Covalima, Filomena Cardoso, enkoraja feto sira atu labele kaben sedu no reforsa feto iha setór edukasaun, nune’e labele husik feto iha kotuk.
“Ha’u enkoraja alin feto sira ne’ebé sei eskola hodi halo tuir deklarasaun, ha’u fiar 100% Covalima bá oin”, Filomena Cardoso hato’o iha ámbitu komemorasaun Loron Internasionál Feto, iha salaun Parokiál Zumalai, ohin.
Nia salienta katak polítika Governu nia ba Covalima mak promove feto na’in-haat asume kargu diretora munisípal ba asuntu sosiál, ba ONG, ba finansa munisipál no jestaun merkadu no turizmu.
“Autoridade Covalima entuziazmu hamutuk ho feto sira hodi komemora Loron Internasional Feto hodi fó hanoin ba mane sira. Bá futuru bele aselera igualdade jéneru labele iha de’it kuzña no feto tenke luta maka’as atu promove igualdade jéneru nune’e sira labele hela iha kotuk”, afirma.
Jerente interinu World Vision Covalima,Tomás Afonso Amaral, dehan ho selebrasaun loron internasionál ne’e, feto hotu fó atensaun ba mane sira atu apoia sira iha asuntu sosiál no ekonómiku.
Loron internasionál ne’e bolu ema nia atensaun atubele atu kuidadu no respeita sira hodi fó oportunidade, nune’e labele husik feto sira iha kotuk. Tanba ne’e, Organizasaun Internasionál World Vision hamutuk ho Fokupers organiza komunidade no estudante ensinu báziku no sekundáriu hala’o marsa saudavel hodi iha postu administrativu Zumalai, munisípiu Covalima. Marsa ne’e hahú husi salaun parokiál Zumalai to’o iha ponte Mali Seran hafoin bá fali salaun refere
Reprezenta Diretora Fokupers, Silveiro de Araújo, aprenzenta máteria kona-ba asuntu ekonómiku feto no balansu ekonómia tanba ekonómia hanesan siensia ida ne’ebé estuda kona-ba nesesidade ema nian.
“Iha ekonomiaoinsá mak bele garante feto sai ema ne’ebé independente. Ita presiza investe ba feto no labarik feto iha vida ekonomia no edukasaun, nune’e iha abilidade ba moris”, nia fó hanoin.
Jornalista: Celestina Teles
Editora: Maria Auxiliadora
