OÉ-CUSSE, 14 marsu 2024 (TATOLI) – Autoridade Rejiaun Administrativa Espsiál Oé-Cusse Ambeno (RAEOA), liuhosi Sekretaria Rejionál ba Asuntu Saúde, kinta ne’e lansa distribuisaun ai-moruk albendazole iha Eskola Bázika Sentrál (EBC, sigla portugés) 01 de Maio Palaban, sub-rejiaun Pante Makasar hodi prevene moras lumbriga ba labarik sira.
Notísia relevante: Saúde RAEOA distribui muskateiru ba komunidade prevene moras malaria
Sekretáriu Rejionál ba Asuntu Saúde, Luís de Jesus Neno, hateten, programa distribuisaun ai-moruk albendazole ne’e, alvu ba estudante 22.686 mai hosi eskola 98 iha Oé-Cusse, no priodade liu ba labarik idade tinan 6 to’o tinan 14.
“Programa ida-ne’e kada tinan ita hala’o, tanba moras ida-ne’e sempre akontese iha ema hotu, tantu labarik no adultu, maibé agora ita fó liu ba labarik sira atu prevene moras lumbriga, tanba ho ai-moruk albendazole bele prevene sira, atu fó isin di’ak, bainhira sira konsumu hahán ruma, lumbriga labele xupa demais hahán ne’ebé sira konsumu, no programa ne’e abertura tarjetu ba estudante 22.686, mai hosi eskola 98,” Luis de Jesus Neno, ko’alia iha eskola EBC Palaban.
Eis Xefe Sentru Oésilo ne’e, informa antes ne’e iha tinan rua kotuk programa distribuisaun ai-moruk albendazole paradu, tanba finansiamentu ba programa ne’e la sufisiente, maibé tinan ne’e liuhosi polítika IX Governu Konstitusionál komesa hahú fali atu halo prevensaun lumbriga ba eskola sira.
Iha fatin hanesan, Sekretária Rejionál ba Asuntu Eduksaun, Inácia Tamele, konsidera distribuisaun ai-moruk albendazole importante, ba estudante sira atu prevene-aan hosi moras lumbriga, nune’e bele kontribui mós ba partisipasaun iha prosesu aprendizajen ho di’ak.
“Tan ne’e, ohin ha’u bolu atensaun ba manorin sira, atubele tau matan ba estudante sira, la’ós ba moras lumbriga ne’e de’it, maibé moras sira seluk mós, nunne’e bainhira estudante hetan moras, presiza asesu ba fasilidade saúde atu hetan tratamentu, tanba tuir orientasaun hosi saúde katak, estudante atu simu ai-moruk albendazole ne’e tenke idade tinan 6 to’o tinan 14,” nia katak.
Notísia relevante: Autoridade RAEOA kontrata INFPM ho kustu rihun $511 atu fornese ai-moruk
Entretantu, tuir kalendáriu, distribuisaun ai-moruk ne’e hahú uluk ba eskola sira iha sub-rejiaun Pante Makasar, sei kontinua ba sub-rejiaun Oésilo, Pássabe no Nítibe.
Jornalista: Abílio Elo Nini
Editór: Evaristo Soares Martins
