DILI, 18 marsu 2024 (TATOLI)— Vise-ministru Komérsiu no Indústria (MCI), Agusto Junior Trindade informa, relatóriu husi empreza distribuidór sira daudaun ne’e ekipa sei halo verifikasaun hafoin submete ba Ministériu Koordenadór Asuntu Ekonómiku (MKAE) hodi halo pagamentu.
“Ami hatene katak Vise-primeiru Ministru no Ministru Koordenadór Asuntu Ekonómiku no Ministru Turizmu no Ambiente husu relatóriu empreza distribuiór sira, maibé ami sei halo verifikasaun hanesan invoice sira ne’ebé mak tama. Ami sei haree didi’ak hafoin ami submete ba MKAE hodi halo pagamentu,” Agusto Junior Trindade informa ba jornalista sira iha Portu Dili, ohin.
Nia dehan, relatóriu sira ne’e tenke haree didi’ak hafoin submete tanba empreza sira hatama invoice no dokumentu barak.
“Relatóriu sira ne’e ita haree didi’ak tiha cross-check lai ida-ida, tanba dokumentu sira ne’e barak depois mak ita submete ba MKAE hodi halo pagamentu iha tempu badak tanba ita hatene katak ita tenke halo buat sira ne’e ho kuidadu, tanba osan ne’e osan Estadu, entaun dokumentu invoice ne’ebé mak tama barak ita halo ida idak manualmente ho cross-check ba sira-nia, entaun hotu ida ne’e mak tama ba prosesu pagamentu,”nia esplika.
Governante ne’e haktuir, MKAE fó mensajen kona-ba relatóriu ida ne’e di’ak, tanba ne’e responsabilidade ida katak atu serbi Estadu ho rai ida ne’e tenke ho di’ak.
“Ha’u hanoin di’ak tebes ba MKAE nia mensajen atu hateten katak,ita hotu tenke responsabilidade ida de’it hodi serbi la’ós, ita halo buka fali previléjiu seluk; ne’e lae, tanba ne’e mak halo ho responsabilidade no komitmentu katak apoiu ne’ebé mak fó tenke to’o duni iha komunidade sira hodi sente duni saida mak ita fó,” ezekutivu ne’e rekorda.
Vise-ministru Komérsiu no Indústria, Agusto Junior Trindade haktuir, durante empreza ne’ebé mak Governu halo kontratu halo negosisaun di’ak, tanba empreza mak responsabilidade sosiál ba komuniddae bainhira Estadu presiza sira, entaun ida ne’e oinsá bele servisu hamutuk ba oin.
“Setór privadu ho Governu tenke iha relasaun metin atu nune’e bele sasan sira ne’e to’o iha komunidade nia leet ho presu ne’ebé Governu regula,” Vise-ministru hateten.
Iha fatin hanesan, Empreza Loja Kreativu Furak, Yati Jaka, informa, relatóriu empreza nian submete ona ba Governu iha fulan dezembru tinan kotuk hodi hein pagamentu.
“Ami-nia relatóriu submete ona iha fim-de-dezembru 2023. Tanba ne’e, agora ami hein Governu atu halo pagamentu,” Yati Jaka konklui.
Jornalista : Felicidade Ximenes
Editór: Rafael Ximenes de A. Belo
