DILI, 20 marsu 2024 (TATOLI)—Xefe Departamentu iha Saneamentu iha Autoridade Munisipál Dili (AMD), Domingos do Santos Soriano, hateten, lixu ne’ebé nakonu iha jardin sira Autoridade Munisipál Dili rekoñese rekursu umanu la sufisiente.
Ko’alia-kona jardin iha Cristo Rei to’o João Paulo jardin sira ne’e, Diresaun Turizmu entrega ona mai AMD. Entaun, iha tinan kotuk liuhusi Governu halo manutensaun no tau pesoál sira hodi halo limpeza maibé to’o iha 31 dezembru sira-nia kontratu ramata. Nune’e husi janeiru to’o agora pesoál limpeza menus,” Domingos do Santos Soriano dehan ba TATOLI iha nia kna’ar fatin Matadouru, foin lalais ne’e.
Domingos dos Santos informa, pesoál sira ne’ebé kontratu ramata iha 31 dezembru liuhusi pesoál mão de obra no hetan kontratu husi Postu Administrativu sira iha Munisípiu Dili.
“Sira ne’ebé kontratu hotu iha 31 de dezembru ne’e postu administrativu sira mak fó kontratu iha tinan kotuk pesoál hamutuk 140. Maibé, agora daudaun sira-nia pesoál hela 52 mak halo limpeza hela maibé ida ne’e la sufisiente,” nia rekoñese.
Xefe Departamentu iha Saneamentu iha AMD, Domingos do Santos Soriano hateten, jardin sira ne’ebé iha mak hanesan Cristo Rei, João Paulo Tasi tolu, Jardin Motael, Jardin Farol, Jardin 5 de Maio, Largo Lecidere inklui Jardin Nossa senhora no seluktan.
“Pesoal limpeza sira seidauk sufisiente entaun ami hamutuk ho ekipa sira tuun ba limpeza jerál iha jardin Motael, 5 de Maio, Largo Lecidere, Cristo Rei, jardin Farol no Jardin Nossa Senhora tanba ami haree katak jardin sira fo’er duni, maibé ami-nia ekipa sira ba hamoos iha dadeer no ra’ut iha lorokraik, maibé seidauk hotu no ami mós raut lixu sira ne’ebé mak nakonu iha bidon sira nakonu iha ne’eba ami tau pesoál ida, maibé la aguenta tanba jardin luan no lixu mós barak,” nia relata.
Tanba ne’e, nia husu ba ema sira ne’ebé mak ba tuur halimar iha jardin tenke so’e lixu iha nia fatin, la bele so’e lixu arbiru hodi hafoer jardin sira ne’ebé mak Governu kria ona.
“Ba ema sira ne’ebé mak refreshing iha jardin sira ne’e mak la iha konsiénsia banhira han buat ruma la lori ba tau iha lixu fatin no sira soe kekar ikusmai ita haree katak jardin sira ne’e lekar ho fo’er sira,” nia konsidera.
Ezekutivu ne’e relata, pesoál permanente ne’ebé mak hala’o servisu limpeza iha kapitál Dili hamutuk besik atus rua.
Jornalista : Felicidade Ximenes
Editór: Rafael Ximenes de A. Belo
