COVALIMA, 27 Marsu 2024 (TATOLI) – Estrada rurál husi postu administrativu Fohorem, Fatumea no Suai tama ona iha lista submisaun atu halo reabilitasaun ho distánsia kilómetru 23,28 ho nia orsamentu $3,5 ne’ebe prevee iha orsamentu 2023, informa Diretór Servisu Munisipál Obra Públika Covalima, Sidónio Gusmão.
“Bazeia ba levantamentu dadus 2023 lista projetu 19, husi númeru ne’e projetu hitu tama ona iha lista submisaun reabilitasaun estrada rurál husi postu bá suku sira ne’ebé haree kondisaun estrada grave”, Sidónio Gusmão informa iha Santa Rosa, ohin.
Husi rezultadu fiskalizasaun hatudu katak komunidade postu administrativu hitu iha Covalima maioria asesu ona estrada rurál, maibé presiza de’it halo reabilitasaun hodi fasilita movimentu transporte públiku. Bainhira atu hahú reabilitasaun ida-ne’e kompeténsia husi nasionál, maibé iha ona lista submisaun ba reabilitasaun estrada rurál.
“Ha’u halo aprosímasaun ho diresaun nasionál hodi fasilita prosesu, tanba suku balun tama ona iha lista submisaun ba reabilitasaun estrada rurál”, dehan.
Suku ne’ebé tama iha lista submisaun reabilita estrada rurál hanesan iha postu administrativu Fatumea iha suku Nanu ho distánsia kilómetru tolu ho nia orsamentu $419.614,16, postu Fohorem iha suku Dato-Tolu ho distánsia kilómetru tolu ho nia verba $ 495.172,65 no postu Suai iha suku Beco Tobur hahú 7+00 ho kilómetru 3,5 ho nia orsamentu $597.516,48. Estrada rurál Beco Tobur hahú 9+00 kilómetru 3,00 ho osan $433.999,43, Beco tobur hahú 0+000 kilometru 3,50 ho verba $537.724,46 no estrada Beco Tobur hahú 14+00 ho kilómetru 3,78 ho orsamentu $494.192,82.
Administradór postu Fatumea, César Madeira, esplika katak estrada rurál iha suku Nanu, aldeia Tradukama, presiza duni atu tama iha submisaun ba reabilitasaun estrada rurál, tanba iha realiadade, bainhira iha tempu udan kondisaun estrada ne’e grave no difikulta transporte públiku no privada halo movimentasaun.
“Ita haree estrada rurál iha postu administrativu Fatumea nia kondisaun grave hanesan iha suku Belulik-Leten, iha aldeia Belulik-Kraik, no suku Nanu, iha aldeia Tradukama, merese duni atu tama iha lista submisaun”, dehan.
Aleinde ne’e, nia relembra katak, foin lalais ne’e, observa ona estrada rurál bá fronteira ne’e presiza atu halo tan reabilitasaun hodi fasilita movimentu transporte públiku no privada iha Fronteira Anin-Fuik.
Notísia relevante: Komunidade difísil asesu estrada iha tempu udan
Jornalista: Celestina Teles
Editora: Maria Auxiliadora
