OÉ-CUSSE, 05 abríl 2024 (TATOLI) – Ekipa Zona Espesiál Ekonomia Dezenvolvimentu Oé-Cusse Ambeno (ZEEDOA), lideradu João Mendes Gonçalves, sesta ne’e, hala’o avaliasaun no aprezentasaun tékniku kona-bá prosesu no progresu levantamentu ba Relatóriu Estadu Dezenvolvimentu Rejiaun Administrativa Espesiál Oé-Cusse Ambeno (RAEOA) ne’ebé Grupu Servisu Tékniku (GST) rekolla ona durante ne’e ba faze finalidade.
Durante iha sesaun aprezentasauan ne’e hetan akompañamentu direita hosi Prezidentee Autoridade RAEOA, Rogério Tiago Lobato, ne’ebé hala’o iha salaun IADE Oé-Cusse.
Notísia relevante: ZEEDOA hahú rekolla dadus hosi Pássabe prepara relatóriu Estadu Rejiaun
Koordenadór ZEEDOA, João Mendes Gonçalves, esplika, objetivu hosi reuniaun ne’e, halo aprezentasaun husi Grupu Servisu Tékniku, durante ne’e hala’o ona servisu, atu prepara Relatóriu Estadu Rejiaun nian, hanesan parte dahuluk husi ZEEDOA nia serbisu tuir mandatu ne’ebé propoin hosi Konsellu Ministru.
“Ha’u maka husu halo enkontru ida-ne’e atu halo evaluasaun ba andamentu progresu serbisu, la’o to’o ne’ebé ona, ha’u kontente ho andamentu serbisu ida-ne’e, ha’u haree antes fulan ida-ne’e remata, ami bele hamosu ona primeiru esbosu ba Relatóriu Estadu Rejiaun nian,” João Mendes Gonçalves, ko’alia iha ámbitu sorumutu ne’e.
João Gonçalves, informa, bainhira Relatóriu Estadu Rejiaun konklui, ekipa ZEEDOA sei prepara worshop ida, no konvida entidade públiku hotu, hosi parsériu dezenvolvimentu, ONG lokál, internasionál, atu avália no apoia opiniaun molok aprezenta ba Konsellu Ministru.
“Agora nia progresu ne’e atu to’o ona iha faze finál, tan ne’e maka to’o finál fulan jullu ami bele remata ona relatóriu ne’e, depois hahú kedas ho faze daruak, ba preparasaun ba planu estratéjiku dezenvolvimentu Oé-Cusse nian no orsamentu ba implementasaun planu ida-ne’e, inklui enkuadramentu legál ba futuru entidade jurídika ida-ne’ebé sei lidera ZEEDOA,” nia kata
Prezidente Autoridade RAEOA, Rogério Tiago Lobato, agradese tanba ekipa ZEEDOA hatudu serbisu ho progresu di’ak, nune’e bele aprezenta ba Konsellu Ministru.
“Ha’u akompaña aprezentasaun ida-ne’e, ha’u agradese tanba serbisu lalais, foin mak fulan rua de’it, esbosu ba relatóriu ne’e besik atu kompleta ona, ne’e di’ak tebes, tanba ne’e hatudu katak sira serbisu lais, tanba komisaun ne’e nia tempu tinan ida atu aprezenta relatóriu ba Konsellu Ministru, maibé aprezenta antes kompleta tinan ida, ne’e di’ak,” nia agradese.
Entretantu, João Mendes Gonçalves, hetan nomeasaun hosi IX Governu Konstitusionál lideradu, Primeiru Ministru Kay Rala Xanana Gusmão, no simu ona pose nu’udar koordenadór ZEESM, no dezigna Régio da Cruz Salu no Herculano de Sousa nu’udar Vise-Koordenadór.
Notísia relevante: ZEEDOA fahe informasaun estudu tékniku ho pontu fokál kona-bá relatóriu Estadu Rejiaun
Jornalista: Abílio Elo Nini
Editór: Evaristo Soares Martins
