DILI, 13 abríl 2024 (TATOLI)– Primeiru-Ministru (PM), Kay Rala Xanana Gusmão akompaña hosi Embaixadór Timor-Leste ba Reinu Unidu, João Paulo lansa simbolikamente programa Podcast “The Citizen’s Connection” hodi fasilita informasaun hotu ba Timor-oan sira iha Reinu Unidu.
Podcast ‘The Citizen’s Connection’ ne’e lansa hosi Primeiru-Ministru, Xanana Gusmão ho Embaixadór Timor-Leste iha Reinu Unidu, João Paulo, iha Otél Sanderson London, sesta (12/04/24).
PM Xanana husu ba Timor-oan sira aproveita programa The Citizen’s Connection hodi tau hanoin di’ak sira hodi tempu ruma fila ba Timor bele kontribui ba Timor-Leste nia futuru ne’ebé prósperu.
“Governu hatene katak, Embaixadór Timor-Leste nian iha Reinu Unidu iha ninia inisiativa no ninia programa atu lori imi hamutuk liután, hamutuk iha hanoin no hamutuk iha hahalok. Ami hatene katak, dok hosi rai ne’ebá (Timor) mais imi nunka haluha, imi mai hosi rai ne’ebá,” PM Xanana hateten liuhosi nota ne’ebé Agência Tatoli asesu sábadu ne’e.
“Imi nunka bele haluha, saida mak imi bele halo ba rai ida ne’ebá. Ne’e duni liuhosi “The Citizen’s Connection” imi hotu buka koneksaun ba malu ho família no maluk sira hotu. Ida ne’e mak bele halo iha Timor laran mós bele sai tiha hosi kuartu ki’ik-oan ida hodi loke luan nia pensamentu ba to’o rai hotu, tanba Timor-Leste la moris mesak, tanba tempu iha mundu muda ba beibeik hodi lori talentu, dezafiu no oportunidade barak,” Xanana reiteira.
Xefe Governu hatutan, mezmu Timor-oan sira servisu iha rai do’ok, maibé sira nunka bele haluha no halo servisu hodi kontribui ba buat di’ak. Mundu globalizasaun ohin hetan mudansa maka’as tebes, tanba ne’e Timor-oan sira maka tenki aproveita buat di’ak hodi haruka sira nia pensamentu no espriénsia atu halo buat di’ak ba sira nia a’an, família no nasaun.
Iha fatin hanesan, Embaixadór Timor-Leste ba Reinu Unidu, João Paulo konsidera lansamentu programa ne’e nu’udar momentu importante tebes hodi halo interkonesaun ba Timoro-oan sira hodi asesu informasaun ne’ebé di’ak ba sira-nia a’an no sosiedade. Alende ne’e fasilita servisu Embaixada nian hodi hala’o misaun diplomatika no atendimentu ba Timor-oan sira ne’ebé hela no servisu iha Reinu Unidu.
“Lansamentu Podcast “The Citizen’s Connection” atu fó hanoin fila fali mai ita katak, ita-nia aman Primeiru-Ministru Xanana sempre dehan, akompaña mundu ho inovasaun iha tinan 20-liu ba hodi muda ita-nia pensamentu, muda ita-nia maneira servisu,” Embaixadór hateten.
“Ho mensajen ida ne’e mak Embaixada iha Reinu Unidu tenta adapta no interprepata hodi embaixada lansa programa ne’e, hodi fasilita ita-nia sidadaun asesu informasaun kona-ba saida maka embaixada-nia servisu no sei konvida Timor-oan sira ne’ebé halo buat di’ak iha Reinu-Unidus para ko’alia no proteje hodi ita util ba nasaun no util ba Reinu Unidu no ita sei bolu ita-nia parseiru sira, deputadu, politíku sira hodi ko’alia kona-ba kooperasaun servisu, istória no seluk-tán,” diplomata timoroan ne’e salienta.
Embaixadór agradese tebes ba IX Governu Konstitusionál ne’ebé tau osan iha Orsamentu Jerál Estadu (OJE), tinan 2024 atu sosa uma no rai ba Embaixada Timor-Leste nian.
“Ita agradese tebes, ita-nia Primeiru-Ministru hakarak aposta ba ita-nia embaixada foun no ita-nia Konsuladu foun iha Irlanda do Norte. Ida ne’e pela primeiraves IX Governu halo programa ida ne’e hosi rai laran too rai liur,” nia tenik.
João Paulo promete sei implementa polítika IX Governu Konstitusionál ne’ebé define Timor-Leste nia polítika esterna ho prinsípiu ida- ne’ebé konsagra sentidu independénsia no soberania mak: ‘Ba Timor-Leste, Laiha Aliadu ka Inimigu, Hotu-Hotu sei Hamutuk no AMIGUS de’it!’. Ida ne’e sai hanesan (Timor) ita-nia Lema, ne’ebé sei orienta ita iha Relasaun Esterna, iha Konjuntura Internasionál ida ne’ebé daudaun ne’e defisil tebes.
Timor-Leste saúda ba País Rejiaun hotu-hotu, ne’ebé fó ona apoiu internasionál iha aspetu oioin, hodi reforsa relasaun di’ak ho Austrália, Indonézia, Nova Zelándia, Xina, Japaun, Koreia Súl, no país membru ASEAN sira seluk.
Timor-Leste mós hakarak saúda ka simu ho di’ak relasaun amizade no solidariedade País sira hanesan Portugál, Brazíl, no komunidade pais PALOP, Kuba, Reinu Unidu, Irlanda, no Estadu Unidu Amérika (EUA), nune’e mós ba Organizasaun Internasionál sira, liu-liu Organizasaun Nasaun Unida (ONU) no ninia Ajénsia, Banku Mundiál, Fundu Monetáriu Internasionál no Banku Aziátiku Dezenvolvimentu, no Governu hakarak reforsa lasu asisténsia téknika no profisionál, ne’ebé Timor presiza hodi kumpre IX Governu nia misaun ba povu no nasaun.
Jornalista : Antónia Gusmão
Editór: Rafael Ximenes de A. Belo
