iklan

BAUCAU

EBF Uaitame ameasada hetan estragu

EBF Uaitame ameasada hetan estragu

Eskola Báziku Filiál (EBF) Uaitame ne'ebé ameasadu bainhira akontese dezastre naturál. Imajen : Espesiál

BAUCAU, 15 abríl 2024 (TATOLI) – Eskola Báziku Filiál (EBF) Uaitame, Suku Uaitame, Postu administrativu Quelicai, Munisípiu Baucau, ameasada hetan estragu tanba iha poténsia rai-halai bainhira mosu dezastre naturál.

Koordenadór EBF Uaitame, Sebastião dos Reis Morreira esplika, eskola referida iha tinan-2017 konstrui husi Ajénsia kooperasaun internasionál Japaun (JICA, sigla inglés), kompostu husi sala tolu, ne’ebé mak atualmente ameasadu hetan estragu bainhira mosu dezastre naturál liuliu iha tempu udan boot monu rai.

“Atu monu ona, maibé ami halo prevensaun liuhusi satan ai maibé labele garante atu metin to’o tinan naruk,” Koordenadór EBF Uaitame hateten liuhusi telefónika, segunda ne’e.

Dirijiente EBF Uaitame ne’e fundamenta, daudaun ne’e komunidade hamutuk ho parte profesór sira halo de’it prevensaun provizóriu hanesan kuda ai-oan sira inklui satan ho ai, maibé ne’e la garante atu metin ba tinan naruk.

Sebastião Morreira husu ba Ministéiru Edukasaun (ME) atu responde prekupasaun no proposta ne’ebé hato’o ona hafoin rai halai iha tinan-2023 hanesan pedidu atu konstrui moru protesaun hodi asegura infraestrutura eskola referida.

“Ami rekomenda ba governu atensaun ba kondisaun eskola liuliu hada barajen ka bronjon atu labele ameasa ba eskola, kuandu la halo prevensaun eskola sei monu ami nia prosesu aprendisajen la lao,” Sebastião Morreira argumenta.

Eskola Báziku Filiál Uaitame afilia ba Eskola Báziku Sentrál Letemumu ne’ebé akumula estudante husi suku Letemumu, Namanei, Baguia, Lakuliu, Guruça inklui Uaitame ho totál alunu hamutuk 159 kompostu primeru to’o terseiru siklu, ho totál profesór 12 kompostu permanente 10 kontratadu na’in rua.

Jornalista   : Natalino Belo 

Editór         : Rafael Ximenes de A. Belo 

 

iklan
iklan

Leave a Reply

iklan
error: Content is protected !!