OÉ-CUSSE, 15 abríl 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) liuhosi Sekretária Rejionál ba Asuntu Agrikultura, planeia atu entegra adubu orgániku Ako’y Magsasakang Orgániku (AMO) iha Orsamentu Jerál Estadu (OJE) ratifikativu 2024 nian.
Notísia relevante: PA RAEOA lansa adubu orgánika hasa’e produsaun no hamate Lakataru
Sekretária Rejionál ba Asuntu Agrikultura, Filomena Sila, esplika, atu entegra adubu orgániku ne’e, tanba daudaun ne’e servisu agrikultura Oé-Cusse simu ona pedidu no preokupasaun barak hosi agrikultór sira, atu presiza apoia adubu orgániku AMO, atu prevene peste iha natar no to’os.
“Preokupasaun agrikultór sira, tinan ne’e ameasa atu falla kolleta (gagal panen), tanba impaktu hosi peste estraga produtu, hanesan batar no hare, no barak mós hatama ona pedidu mai ami, husu apoia kona-bá adubu orgániku AMO, preokupasaun sira-ne’e ita simu ona,” Filomena Sila hateten, iha Oé-Cusse, segunda ne’e.
Nia dehan, iha fevereiru foin lalais ne’e, Autoridade RAEOA lansa ona adubu orgániku AMO ne’e iha natar Holosa suku Lalisuk, no rezultadu hatudu progresu di’ak, tanba bele hamate peste lakataru, haburas hare sai matak no hasa’e produsaun, bele uza mós ba ortikultura no produtu seluk tán.
“Adubu orgániku AMO ne’e folin karun, no orsamentu ne’ebé prevee tinan ne’e la envolve adubu ne’e, ita sei la’o hela ho planu orsamentu autoridade anteriór nian, maibé ida-ne’e ha’u hato’o ona pedidu ba Prezidente Autoridade, foin daudaun ba iha nasionál mós relata ba ministru agrikultura, katak komunidade barak maka presiza apoia adubu orgániku AMO, ne’ebé ita planu ona hatama kedas iha planu orsamentu ratifikativu 2024 nian, atu propoin nia orsamentu ketak,” nia katak.
Notísia relevante:Autoridade RAEOA kolleta batar ektare 12 iha Nipani
Entretantu, iha loron sesta semana kotuk, agrikultór Agostinho Sila no Mateus Auni, nu’udar natar na’in-sira iha natar Kakatua suku Lifau sub-rejiaun Pante Makasar, preokupa tanba hare sira iha natar Kakatua ekare 31,16 hetan atakasaun hosi peste lakataru fó ameasa atu falla kolleta ba époka 2024 nian.
Tan ne’e, agrikultór na’in-rua ne’e, sira reprezenta natar na’in-112 iha natar Kakatua, rekomenda ba Autoridade RAEOA liuhosi Sekretária Rejionál ba Asuntu Agrikultura atu konsidera, tanba antes ne’e hato’o mós pedidu ofisiál ida atu husu apoia adubu orgániku AMO.
Notísia relevante: Peste ataka natar ektare 31 iha Lifau
Jornalista: Abílio Elo Nini
Editór: Evaristo Soares Martins
