DILI, 19 abríl 2024 (TATOLI) – Prezidente Interinu Komite Paralímpiku Nasionál Timor-Leste (CPNTL), Mateus Lucas, hateten, prepara ona modalidade rua hodi kompete iha jogu CPLP ne’ebé sei akontese iha tinan oin ne’ebé Timor-Leste mak sai hanesan uma-na’in ka infitriaun.
“CPNTL nia modalidade rua mak sei kompete hotu iha jogu CPLP tinan oin ne’e. Kada modalidade ne’e sira halo preparasaun antes ona. Ne’ebé, ami preparadu atu kompete. Modalidade rua ne’e mak Atletizmu ho Xadrez,” Mateus Lucas hatete ba Agência TATOLI iha edifisiu Ministériu Juventude, Desportu, Arte no Kultura (MJDAK), sesta ne’e.
Nia dehan, atleta husi modalidade rua ne’e ho idade 19-20 no prepara ona atleta besik 10 maibé kada federasaun sei halo selesaun mak foin deside hirak ne’ebé iha prestasaun di’ak mak bele kompete.
“Atleta modalidade sira prepara ona. Ami sei enkontru ho sira mak ita atu hatene atleta husi CPNTL na’in hira mak tuir kompetisaun ne’e, maibé kada modalidade halo hela preparasaun,” nia tenik.
Tuir nia, daudaun ne’e komunikasaun entre CPNTL di’ak tebes no sempre hala’o reuniaun kada semana hodi hatene kona-ba kondisaun atleta sira nian.
Preparasaun modalidade basketból ba jogu CPLP
Alende ne’e Vise Sekretáriu Jerál Federasaun Basketból Timor-Leste (FBTL), Inacio Fonseca, hateten, preparasaun basket nian mínimu tebes maibé prontu atu kompete iha jogu ne’e tanba Timor-Leste mak sai hanesan uma-na’in.
“Ita-nia preparasaun bele dehan mínimu tanba loloos jogu ne’e atu realiza tinan ida-ne’e, maibé muda fali ba tinan oin afeita ba ami-nia atleta sira ne’ebé mak ami prepara ona iha tinan sira ba kotuk, tanba kritéria jogu CPLP nian atleta sira tenke iha idade 17 labele liu, maibé ba tinan oin ita-nia atleta sira-nia tinan liu ona husi 17. Entaun, agora ita hahú iha faze foun fali hodi halo fali treinamentu ba atleta foun maibé laiha buat ida ita kompete,” nia katak.
Tanba ne’e iha tinan kotuk FBTL koopera ho Organizasaun Nasaun Unida iha Timor-Leste konsege realiza kompetisaun basketbal iha Munisípiu, Lautem, Dili, Baucau no Rejiaun Administrativu Oé-Cusse Ambeno (RAEOA) konsege identifika ona atleta potensiál lubuk ida ne’ebé prepara ba jogu CPLP hodi substitui atleta sira ne’ebé idade liu ona.
Iha jogu ne’e basketból sei prepara ekipa feto ho mane ho jogadór hamutuk 12 feto neen mane neen.
“Ho nune’e ami sei realiza fali mini-kompetisaun ida atu nune’e bele halo selesaun ba atleta sira ne’ebé ita identifikadu ona husu Munisípiu sira ne’e, tempu sei biban ba ita atu halo,” nia dehan.
Jornalista: Hortencio Sanchez
Editór: Rafael Ximenes de A. Belo
