Dili-Impedimentu ba konstrusaun lixeiru balun rezolve ona
DILI, 19 abríl 2024 (TATOLI) – Xefe Unidade Project Manegement Unit (PMU) iha Autoridade Munisípiu Dili, Jose Francisco Amaral, hateten lider komunitáriu sira halo ona aprosimasaun ba komunidade atu koopera hodi halo kontrusaun ba lixeiru balun ne’ebé mak hetan impedimentu.
“Iha semana kotuk ami hamutuk ho lider komunitáriu sira husi Leste no Oeste, aproxima ona ita-nia komunidade no konsensializa ekipamenttu modernu ba sira, atu sira bele simu teknolojia foun ida-ne’e, entaun sira hahú koopera atu halo kontrusaun lixeiru”, Jose Francisco Amaral hateten ba TATOLI iha nia kna’ar fatin, ohin.
Nia rekoñese katak iha duni impedimentu balun husi komunidade, tanba fatin lixeiru balun halo iha sira-nia rai privadu no mós balun besik kedas komunidade nia hela fatin.
“Komunidade balun halo impedimentu ne’e, tanba lixeiru ne’e monu duni iha sira-nia rai privadu no balun besik kedas komunidade nia hela fatin, entaun durante ne’e komunidade balun lahetan esklaresimentu di’ak, mak sira balun ladún halo kooperasaun”, nia esplika.
Nia afirma, autoridade komunitáriu sira halo aprosimasaun ba komunidade atu bele koopera no iha semana ida-ne’e konsegue rezolve ona lixeiru 20 ba leten no balun iha ona negosiasaun atu bele konstrui tan.
“Iha semana ida-ne’e ita konsegue rezolve ona balun no balun iha ona negosiasaun atu bele konstrui tan”, nia relata.
Nia husu ba lideransa komunitáriu sira atu ba futuru tenke halo sosializasaun ba komuniddae atu bele servisu hamutuk ho sira nune’e bele simu teknolojia sira ne’e.
“Ba futuru atu atinje ita-nia pontu kolesaun sira mak lider komunitáriu sira nafatin halo sosializasaun ba komunidade, nune’e sira bele simu teknolojia ida-ne’e, tanba durante ne’e halo sosializasaun dahuluk tama sai bairo hodi informa kona-ba utiliza ekipamentu modernu sira ne’e, oinsá prepara konstrusaun lixeiru ida-ne’e, ita fó hatene hotu maibé maioria apar ona informasaun sira ne’e no ita-nia komunidade balun iha terenu kontribui ona”, nia haktuir.
Tanba ne’e, iha fulan-Maiu ho juñu, ekipamentu modern, hahú halo ona operasaun hodi raut lixu iha kapitál Dili.
“Kontrusaun lixeiru ne’ebé finaliza ona mak hamutuk liu 400, ita sei pinta no tau Munisípiu Dili nia logo depois ita halo operasaun”, nia konklui.
Notísia relevante : Vizita Amu Papa-Dili tenke moos maibé konstrusaun lixeiru seidauk konklui tanba impedimentu
Jornalista : Felicidade Ximenes
Editór : Zezito Silva
