DILI, 19 abríl 2024 (TATOLI) – Diretór Kompetisaun no Futeból Profesionál Federasaun Futeból Timor-Leste (FFTL), Frederico Martins, hateten, daudaun ne’e termina ona rejistrasaun klube ba kompetisaun kopa FFTL no iha klube hamutuk 12 mak konfirmadu kompete.
“Iha semana rua kotuk ita loke ona ba públiku atu mai rejistu sira nia klube atu kompete iha kopa FFTL nian, horseik ita termina ona rejistrasaun. Entaun, iha klube futeból hamutuk 12 mak konfirmadu ona atu tuir kompetisaun ne’e. Klube nia naran ami labele fó sai lai. Klube sira ne’e balu husi Dili balun husi Munisípiu,” Frederico hatete ba Agência TATOLI iha edifisiu FFTL Dili, sesta ne’e.
Klube 12 ne’e sei fahe ba grupu rua A-B, kada grupu ida sei iha klube neen no jogu sei hala’o durante fulan rua ka tolu. Jogu sei hala’o iha Estádiu Munisipál Dili.
Nia dehan, tuir orariu ne’ebé iha jogu atu hala’o iha 02 maiu fulan-oin, maibé tanba klube balun husu FFTL tenke muda tan oráriu ba oin uitoan nune’e klube sira bele prepara sira nia jogadór ho másimu nune’e jogu sei hala’o fali iha semana da-rua fulan maiu nian.
Rekorda fali katak, antes ne’e FFTL fó prioridade ba klube Liga Futeból Timor-Leste (LFTL) mak iha direitu absoluta tuir kompetisaun ne’e. Maibé, tanba klube maioria iha LFTL lakohi kompete nune’e FFTL foti desizaun loke ba públiku atu ba rejistu.
Bainhira FFTL loke oportunidade klube ualu mak interresadu ba rejistu hamutuk ho klube LFTL haat, nune’e totál klube hamutuk 12 mak sei kompete.
Iha jogu ne’e FFTL prepara ona premiu ba manán-na’in sira primeiru lugar sei hetan osan $15.000, segundu lugar $10.000, terseiru lugar $7,500 no kuartu lugar $5,000.
Jornalista: Hortencio Sanchez
Editór: Rafael Ximenes de A. Belo
