Polísia detein suspeitu ne’ebé komete krime ”extorção e devassa”
DILI, 19 abríl 2024 (TATOLI) – Polísia Nasionál Timor-Leste, Departamentu Investigasaun Kriminál (DIK) Nasionál ezekuta mandadu judisiáriu hosi Tribunál Primeira Instánsia Dili (TJPID) hodi detein suspeitu ho isiál VMXB ne’ebé públika video pornografia iha rede sosiál facebook (extorção e devassa).
Suspeitu VMXB públika video pornografia ida iha nia konta facebook ho deskrisaun ida katak ema ne’ebé mak iha video ne’e mak sidadaun feto ida ne’ebé ho inisiál MV ne’ebé daudaun ne’e hanesan artista timoroan ida.
Hafoin publikasaun video ne’e, suspeitu VMXB lakohi entrega aan direta ba polísia hodi submete ba identifikasaun. Nune’e Tribunál Primeira Instánsia Dili iha sesta (19/4), ohin, hasai mandadu hodi husu ba Departamentu Investigasaun Kriminál atu detein suspeitu.
Ekipa hosi Departamentu Investigasaun Kriminál ba foti suspeitu VMXB iha nia uma, área Bebonuk hodi lori mai iha Komandu Jerál PNTL Caicoli, hodi submete ba prosesu identifikasaun antes halo detensaun durante oras 72.
“Mandadu Judisiáriu ida-ne’e autoriza Polísia Departamentu Investigasaun Kriminál detein suspeitu ho inisiál VMXB ba krime extorção e devassa ne’ebé previstu iha artigu 270 no 183 hosi Kóndigu Penál Timor-Leste no polísia bele halo detensaun ba suspeitu ho isiál VMXB iha oras 72, molok aprezenta ba Primeira Interogatória iha Tribunál Judisál Primeira Instánsia Dili”, sita hosi komunikadu ne’ebé TATOLI asesu, sesta, ohin.
Kazu ida-ne’e, Departamentu Investigasaun Kriminál rejista ho NUC 0233/24.DICMR.
Jornalista: Natalino Costa
Editór : Zezito Silva
