DILI, 04 abríl 2024 (TATOLI)—Ekipa AS Cantada dudu-sees Dark Blue FC ho golu 3-2 iha ninia jornada dahuluk iha jogu Tasa Maun Boot Xanana Gusmão ne’ebé realiza iha Estádiu Munisipál Dili, sábadu ne’e.
Iha sábadu (04 maiu 2024) lorokarik ne´e, iha tuku 14h00, antes As Cantada manán Dark Blue FC ho golu 3-2, kalohan be falun lalehan halo loromatan nia roman hahú namlaek. Ema wa’in ba wa’in hahú solur ain hakat-tama ba Estádiu Munisipál nia laran, atu asiste jogadór sira liki ain bidu no halai ba-mai iha duut matak nia leten.
Arbitru ne´ebé lidera jogu ne´e, orienta ekipa rua ne’ebé atu joga hanesan AS Cantada no Dark Blue tenke prepara aan hakat ba kampu laran ho uniforme ne’ebé la hanesan. Ekipa Dark Blue hatais farda kór matak nurak no Cantada uza farda kór mutin no kombinasaun ho kór matak.
Bainhira jogu komesa, ekipa rua lansa kedan kontra no atake ba malu tuir tékniku no abilidade ekipa ida-idak nian atu buka oinsá mak bele hatama golu.
Durante jogu, ekipa rua hatudu forsa ne’ebé sériu ba malu, maibé iha menutu tolu (3), ekipa Dark Blue nia defeza kontrola bola iha rede oin la ho di’ak, jogadór Cantada Rivaldo Pereira (10) utiliza fallansu ne’e hodi lansa kedan xutu ba rede Dark Blue hodi muda rezultadu ba 1-0.
Golu ida-ne’e hanesan golu lais liu ne’ebé tenke obriga jogadór Dark Blue tenke servisu makaas, nune’e halo empata jogu ne’e maibé jogadór Cantada mós la fo fatin ba ekipa Blue, nune’e jogu ne´nia rítmu hahú manas liután.
Bolamania sira-ne´ebé iha tribun leten Estádiu nian hakilar no basa liman. Hodi fó apoiu ba jogadór sira husi ekipa rua ne´e atu bele hatudu jogu bonito tuir rítmu tebe-tebe iha kampu laran.
Maske hatama ona golu ida maibé jogadór sira buka nafatin oportunidade hodi kedok bola bola ba-mai iha kampu laran. Kontinua esforsu ho jogu ofensivu nune’e iha menutu 19 Cantada hetan tan oportuniade di’ak husi jogadór Adios Rires (3) lansa kedan xutu ida hakmatek halo guarda rede Blue la antesipa ho di’ak, nune´e bola tama liu ba rede laran no muda tan rezultadu ba 2-0.
Husi golu ne’e halo jogadór Blue tenke esforsu makaas liután. Treinadór konsege estuda jogu Cantada nian no halo mudansa ba lina klaran, nune’e avansadu Blue bele hetan bola ho di’ak, ho mehi ida atu bele hatama golu ruma. Iha mudansa jogu ne’e la hela de’it hanesan mudansa, tanba iha menutu 28, jogadór Policarpo Meco responde ona golu ida ba Cantada hodi muda rezultadu ba 2-1.
Biar hatama ona golu maibé Blue seidauk satisfas no iha ambisaun makaas atu halo empata jogu ne’e, maibé Cantada la nonook de’it, maibé to’o primeira parte termina ne´e rezultadu manetin ho 2-1.
Tama ba segunda parte, ekipa rua nafatin hatudu jogu ne’ebé bonitu hodi anima adeptu sira iha tribun leten. Cantada lansa kontra atake ne’ebé éeriu halo Blue dada iis la hetan iha kampu laran, maibé Blue nafatin hatuur nia dignidade nu’udar ekipa hodi luta kontra maske derrota ona.
Esforsu ne’ebé Cantada halo la hela de’it naran, maibé hatudu duni prova. Katak Cantada ekipa forte tanba menutu 62 jogadór Pascoal Fernandes lansa xutu ida ho velosidade makaas hosi kampu nia klaran ba rede Blue nian halo Guarda Rede halai sala no rezulta golu muda rezultadu ba 3-1.
Akontese tan golu ne’e halo tensaun Blue nian sa’e makaas liutan, tanba susar ona ba sira atu halo empata jogu no halo lakon adversáriu. Maibé, sira nafatin hatudu jogu ho profisionál ne´ebé rezulta avansadu Blue lansa xutu barak ba rede Cantada, maibé sutu hirak ne’e barak halai sees tia husi alvu no Guarda Rede Cantada salva.
Maske nune’e, la hamate johgadór Blu nia vontade. Cantada halo kontra no atake makaas hodi aumenta golu maibé Defeza Blue nian la fó fatin. Ikus mai iha menutu 80, jogadór Blue Dilivio dos Santos (26) tenta halo golu ida hodi muda rezultadu ba 3-2.
Golu ne’e fó ksolok tebes ba Blue ho nia adeptus sira, maibé laiha oportunidade tan hodi halo empata ho Cantada to’o jogu segunda parte termina.
Ho nune’e jogu termina vitoria hela ba Cantada maske manán ho golu mihis, enkuantu Blue tenke hela ho derrota hodi hein fali jogu seluk tuir mai.
Jogu ne’e dirije husi árbitru prinsipál João Vieira, juiz liña Gaspar Soares, Silviano Vieira no ábitru rezerva Bernanrdino Mascarinhas.
Jornalista : Hortencio Sanchez
Editór : Cancio Ximenes
