DILI, 04 abríl 2024 (TATOLI)–Federasaun Atletizmu Timor-Leste (FATL), durante loron rua, finaliza ona kampionatu nasionál atletizmu ho susesu hodi buka fini atleta prepara ba selesaun nasionál ba partisipa jogu internasionál tolu hanesan jogu CPLP, ASEAN University Games no Olimpiku Paris.
Prezidente FATL, Afrânio Xavier Amaral, hateten atividade ne´ebé hala’o iha Estádiu Munisipál Dili ne´e fahe ba kategoria rua mak seniór no juniór ho atleta hamutuk 155, ne’ebé mai husi munisípiu 13 inklui Reziaun Administrativu Oé-Cusse Ambeno (RAEOA).
“Kompetisaun ne’e ita hala’o atu halo selasaun ba atleta sira husi juveníl atu prepara ba jogu CPLP nian. Iha parte atleta senior, ita prepara atu nune’e bele ba kompete iha jogu Olimpiku no jogu University Games ne’ebé tinan ne’e sei hala’o iha Indonézia,” Afrânio hateten ba Agência Tatoli iha Estádiu Dili, sábadu ne’e.
Iha jogu ne’e atleta sira-ne’ebé hatudu prestasaun di’ak, FATL hili kedan ba atleta nasionál nune’e bele halo preparasaun antes hodi hasoru jogu internasionál sira iha rai-li’ur, no prepara mós ba jogu internasionál seluk ne’ebé mak sei akontese iha tinan 2024.
“Kompetisaun ne’e nia alvu ba jogu internasionál tolu ne’e maibé ita mós prepara hela ba jogu internasionál seluk hanesan Tiwan open. Prezidente Federasaun Atletizmu Indonézia mós konvida ona ita atu ba tuir sira-nia kompetisaun iha tinan ne’e, entaun atleta sira-ne’ebé prestasaun di’ak, ita hili hotu atu prepara nune’e responde ba kompetisaun hirak ne’e,” nia dehan.
Iha sorin seluk, Prezidente Assosiasaun Atletizmu Munisípiu Manufahi, Manuel da Silva hateten, kompetisaun durante loron rua fó vantajen ba atleta munisípiu sira hodi kompete nune’e promove sira-nia talentu iha mundu atletizmu.
“Kompetisaun ne’e importante tebes. Durante loron rua, ami sente kapas tebes. Eeventu hanesan ne’e tenke kontinua nafatin ba oin, atu nune’e lori atleta sira iha área rurál mós mai kompete,” Manuel hateten.
Tuir nia, kampionatu nasionál ne’e la’o ho susesu no fiar katak nia atleta sira-ne’ebé hatudu prestasaun di’ak, FATL sei hili atu tama iha selesaun nasionál nune’e bele ba kompete iha jogu internasionál.
Prezidente Assosiasaun ne’e hatutan, nafatin esforsu atu orienta treinadór sira iha ,unisípiu atu iha vontade nafatin fó formasaun ba atleta sira atu nune’e kada tinan bele prodús atleta ne’ebé kualidade hodi hamorin Timor-Leste nia naran iha mundu.
Prezidente Assosiasaun Atletizmu Munisípiu Liquiç,a Lusinha de Jesus Gonçalves, sente kontente bele lori atleta hamutuk na’in-lima (5) ho ofisiál na’in-ida (1) mai kompete iha eventu ne’e.
“Ha’u sente kontente tebes tanba bele lori ami-nia atleta sira mai tuir kompetisaun. Ha’u-nia atleta na’in-ida (1) halai iha metru 10.000 konsege hetan primeiru lugar, metru 5000 na’in-ida (1) konsege hetan segundu lugar no metru 800 na’in-ida 91) konsege hetan terseiru lugar. Ami kontente tanba mai husi Munisipiu la saugate, fiar katak atleta sira-ne’e bele tama ba selesaun nasionál,” Lusinha hateten.
Nia husu ba FATL kontinua servisu hamutuk ho Governu, nune’e kada tinan bele realiza nafatin eventu ne’e hodi buka fini atleta ne’ebé kualidade hodi reprezenta Timor-Leste ba jogu internasionál sira.
Atleta sira-ne’ebé sai kampiaun iha eventu ne’e fahe tuir ba kategoria sira mak hanesan;
Kategoria juveníl mane iha metru 200
- Primeiru lugar : Selcio Deonizio dos Santos husi Dili.
- Segundu lugar : Marito dos Santos husi Ermera.
- Terseiru lugar : Castro Belo Trindade husi Ermera.
- Kuartu lugar :Veldenicio Ximenes husi Ermera.
Kategoria juveníl feto metru 200
- Primeiru lugar : Alias Maranda husi Dili.
- Segundu lugar : Donita Amaral husi Dili.
- Terseiru lugar : Arsenia Magno Lopes husi Dili.
- Kuartu lugar : Jenia Martins de Carvalho.
Kategoria juveníl mane iha metru 400
- Primeiru Lugar : Marito dos Santos husi Ermera.
- Segundu Lugar : Veldenicio Ximenes husi Ermera.
- Terseiru Lugar : Castro Belo Trindade husi Ermera.
- Kuartu Lugar : Melquiano dos Santos husi Dili.
Kategoria estafeta metru 4×100 juveníl mane
- Primeiru lugar husi Ermera hanesan, Castro Trindade, Veldenico Ximenes, Fricoino de Jesus, Marito dos Santos.
- Segundu lugar okupa husi Dili mak hanesan, Rui Amaral Lopes, Inosencio Soares, Chelio dos Santos, Quelirobin Amaral.
- Terseiru lugar husi eskola An’nur mak hanesan, Nicky Octawidianto, Harum da Silva, Felisberto Cortereal.
Kategoria Estafeta 4X100 juveníl feto
- Primeiru Lugar husi Ainaro no Dili mak hanesan, Arsenia Magno Ramos, Britania Correia, Alisa Miranda, Donita Amaral.
- Segundu Lugar husi An’nur no Ermera mak hanesan, Sandra Exposto, Dircia Maia Soares, Tarcisia Soares, Juvinia dos Santos Silva.
- Terseiru Lugar husi eskola An’nur mak hanesa, Faviola Moniz, Octaviana Ella Eno, Anaclecia dos Santos, Angela Lourdes.
Kategoria seniór mane metru 800
- Primeiru Lugar: Manuel Belo Amaral Ataide husi Ermera.
- Segundu Lugar: Roberto Amaral husi Ermera.
- Terseiru Lugar: Edy Alves Correia husi Liquiça
Kategoria seniór feto metru 800
- Primeiru Lugar : Ligia Fraga husi Baucau
- Segundu Lugar : Maria da Costa husi Ermera
- Terseiru Lugar : Juvita de Jesus husi Ermera
Kategoria seniór mane metru 1,500
- Primeiru Lugar : Roberto B Amaral Soares husi Ermera
- Segundu Lugar : Joanito Fernandes husi Manufahi
- Terseiru Lugar : Manuel Amaral Ataide husi Ermera
Kategoria senior feto metru 1,5000
- Primeiru Lugar : Rubia Martins husi Ermera
- Segundu Lugar: Juvita de Jesus husi Ermera
- Terseiru Lugar : Maria da Costa husi Ermera
Kategoria seniór mane iha metru 5,000
- Primeiru Lugar: Felisberto de Deus husi Ermera
- Segundu Lugar : Vitor Martins husi Aileu
- Terseiru Lugar : Jaqueu de Deus husi Ermera
Kategoria seniór feto metru 5,000
- Primeiru Lugar: Rubia Martins Husi Ermera
- Segundu Lugar : Angelia Fatima husi Liquiça
- Terseiru Lugar : Nelia Martins husi Ermera
Kategoria seniór feto iha metru 10.000
- Primeiru Lugar: Angelia Araujo husi Liquiça.
- Segundu Lugar : Rubia Martins husi Ermera.
- Terseiru Lugar : Juvita Soares Lautem
Kategoria seniór mane metru 10.00
- Primeiru Lugar: Felisberto de Deus Husi Ermera.
- Segundu Lugar : Joanito Fernandes husi Manufahi.
- Terseiru Lugar : Jaqueu de Deus huisi Ermera
Atleta seniór ne’ebé manán iha kurida metru 10.000 Felisberto de Deus hateten, orgullu tanba bele sai kampiaun maske ida-ne´e la’ós esforsu ne´ebé fasil.
“Hanesan atleta ida-ne’ebé reprezenta Munisípiu Ermera sente orgullu bele manán. Antes to’o iha finalidade ne’e ha’u hasoru difikuldade barak maibé la hamate ha’u-nia vontade. Hanesan atleta, ohin, ha’u konsege konkista mehi ne’ebé ha’u iha,” Felisberto hateten.
Nia dehan, ho vitoria ne’ebé nia hetan la hela de’it hanesan ne’e maibé kontinua nafatin hala’ o ninia treinamentu kada loron, nune’e performe ne’ebé iha bele mantein no aumenta di’ak liutan ba oin.
“Ha’u sei la para iha ne’e, hanesan atleta nafatin prepara ha’u-nia aan ba eventu sira tuir mai. Agora mós ha’u prepara aan hela ba jogu ASEAN University Games, ha’u fiar bele reprejenta Timor-Leste ho di’ak,” nia dehan.
Iha fatin hanesan, atleta ne’ebé kampiaun mós iha 5,000, Rubia Martins, hateten sente kontente bele sai kampiaun iha kampionatu nasionál ne’e.
“Hanesan atleta agradese ba Aman Maromak ho nia tulun mak buat hotu bele la’o ho di’ak. Manán ida-ne’e la’ós ikus ona mai ha’u maibé ha’u sei esforsu nafatin atu hasoru eventu sira tuir mai,” nia hateten.
Kampionatu nasionál ne’e realiza tanba hetan apoiu másimu husi Governu liuliu husi Ministériu Juventude, Desportu, Arte no Kultura (MJDAK) ho orsamentu montante $22.000.
Jornalista : Hortencio Sanchez
Editór : Cancio Ximenes
