DILI, 10 maiu 2024 (TATOLI)– Ekipa DIT FC ho Relay Laleia FC obrigadu tenke fahe pontu ba malu basa iha jogu abertura ba Kopa Federasaun Futeból Timor-Leste (FFTL) empata 1-1 no jogu ne’e realiza iha Estádiu Munisipál Dili, sesta lokoraik.
Hanesan baibain jogu hahú ekipa rua lansa kedan kontra no atake ba malu tuir tékniku no abilidade ekipa ida-idak nian nune’e bele hatama golu fó vitoria ba ekipa.
Jogu ba ekipa rua animu tebes husi adeptus sira ne’ebé tu’ur barak iha tribun leten, balun tu’ur nono’ok hateke de’it no balun hakilar ho lian maka’as hodi fó suporta másimu ba ekipa favoritu, nune’e bele fó kontente ba jogadór sira hodi hala’o jogu ho bonitu.
Notisia relevante: 10 Maiu, Klube futeból 16 partisipa abertura kopa FFTL
Ekipa identiku husi Munisípiu Manatuto Relay FC hala’o jogu ho modelu ofensivu no pasa bola husi ain ba ain, la ansi halo golu bainhira seidauk hetan oportunidade, enkuantu DIT lansa kedan presaun ne’ebé maka’as, maibé la konsege sobu defeza Relay nian.
Ho forsa ne’ebé hanesan ekipa rua so sadik malu de’it iha kampo laran no seidauk iha kbiit atu prodús golu ruma nune’e fó vitoria ba sira nia ekipa.
DIT nu’udar ekipa primeiru divizaun iha Liga Futeból Timor-Leste (LFTL) halo esforsu makas tanba dignidade, maibé esforsu hirak ne’e hela de’it hanesan esforsu tanba Relay la fó fatin ba DIT atu lansa golu tuir nia hakarak.
Minutu halai ba dadauk, jogu mós kontinua la’o ho m’asimu, jogadór sira pintas bola ba mai husi ain ba ain haleu kampo laran maibé la hatudu rezultadu signifikativu. Ho nune’e minutu primeira parte termina laiha golu ruma mak akontese ba ekipa rua no klube rua tenke empata 0-0.
Dolar ba segunda parte ekipa rua kontinua hatudu jogu ne’ebé profesionál hodi atake malu liuhusi sutu barak maibé sutu hirak ne’e la kona iha alvu no sutu barak mós Guarda Rede rua tenta baku sai.
Ekipa Relay hakas aan makas oinsa bele hatudu rezultadu ne’ebé di’ak liuhusi jogu, tatika barak mak jogadór sira halo ikus hatudu duni rezultadu, jogadór Relay hetan oportunidade bola falta ida besik lina oin DIT nian bainhira jogadór DIT komete erru hasoru jogadór Relay no árbitru deside fó falta nune’e Relay bele ezekuta sutu ho distansia ne’ebé besik iha minutu 58, sutu ne’e ezekuta husi jogadór José Pereira (5) halo Gurada Rede DIT halai sala ikus bola tama liu ba rede laran hatur rezultadu ba 1-0.
Golu ne’e halo DIT tenke servisu makas nune’e bele halo empata jogu, avansadu DIT José Santos (7) ho nia kolega sira lansa kontra ne’ebé makas maibé jogadór Relay hamate tutuir jogu ho kalma nune’e esforsu DIT nian falla total.
Ho presaun ne’ebé makas husi DIT halo jogadór Relay barak mak laiha ona forsa maske nafatin joga iha kampo laran hodi hein minutu termina sira bele manán jogu. Tekiteki iha minutu 90 jogu la’o oinseluk bainhira bola barullu iha lina oin Relay nian jogadór José Santos responde golu ida muda rezultadu ba 1-1.
Golu ne’e halo Relay sente triste tanba iha los minutu ikus, minutu ne’ebé árbitru atu foti desizaun hapara jogu nune’e Relay bele iha direitu absoluta ba vitoria maibé golu DIT nian kansela total Relay nia vitoria nune’e sira bele fahe de’it pontu ba malu.
Husi golu DIT nian mak termina jogu dala uluk kopa FFTL no ekipa rua laiha ida mak manán no lakon hodi hein fali jogu seluk tuir mai.
MJDAK apresia FFTL
Iha abertura, Ministru Juventude, Desportu, Arte no Kultura (MJDAK), Nelyo Isaac Sarmento, no Prezidente Interinu FFTL Tenente Jenerál Falur Rate La’ek.
“Governu apresia tebes FFTL bele realiza kopa ida-ne’e, ida-ne’e importante tebes tanba tinan ne’e ita nia selesaun sei ba kompete iha jogu kualifikasaun Asian Cup 2027, ne’ebé kontra Mongolia, ho jogu ida ne’e ita bele hetan ona fini jogadór ba selesaun nasionál, tinan oin mós ita iha tan jogu SEA Games iha Tailandia, hanoin kopa ne’e bele ajuda tebes ita,” Ministru Nelyo katak iha nia diskursu.
Maske nune’e, Governante ne’e sente triste ho difikuldade ne’ebé FFTL hasoru ohin loron, maibé Governante ne’e enkoraja nafatin estrutura FFTL katak, difikuldade la sai obstakulu, maibé hanorin oinsa haka’at ba oin.
“Lori naran Estadu liuliu Governu apoia 100% , bainhira jogadór sira atu ba joga iha li’ur, Estadu prontu atu fó apoia,” nia tenik.
Iha fatin hanesan, Prezidente Interinu FFTL, Tenente Jenerál Falur Rate Laek, husu ba jogadór klube 16 ne’ebé kompete iha jogu ne’e atu hatudu disiplina, nune’e bele dezenvolve futeból Timor-Leste nian.
“Eventu ne’e hanesan esperansa bola nian iha Timor-Leste. Jogadór sira imi iha vokasaun ba bola joga ho disiplina. Ita hotu nia tempu atu hadi’a futeból ba oin tenke koopera hamutuk atu hatu’ur aliserse ne’ebé metin lori ita nia futeból ba oin, naksalak ita hadi’a, maibé futeból tenke ba oin,” Tenente Jenerál ne’e afirma.
Nune’e nia alerta ba klube sira joga ho dignidade, nune’e lakon mós ho dignidade no manán mós ho dignidade. Bainhira lakon esforsu aan maka’as atu manán iha tempu tuir mai. Bainhira manán kontinua halo di’ak liu ba oin.
Notisia relevante: Gregorio husu klube 16 kompete iha kopa FFTL 2024 joga ho dixiplina
Jornalista: Hortencio Sanchez
Editór: Florencio Miranda Ximenes
