DILI, 13 maiu 2024 (TATOLI) –Ministériu Edukasaun (ME), retro fali pagamentu saláriu ba profesór indeterminadu 400-resin, iha fulan-maiu ne’e.
“Fulan-maiu ne’e ita paga profesór inderterminadu 400-resin. Maiu ne’e ita reativa fali ona sira-nia saláriu hanesan baibain, no retro sira-nia saláriu husi janeiru mai to’o abríl”, Diretora Nasionál Rekursu Umanu, Ministériu Edukasaun (ME), Anita Tavares, hatete, ba Tatoli, iha nia knar fatin, Vila Verde, Dili, segunda ne’e.
Diretora ne’e dehan loloos ne’e paga ona maibé ME presiza dadus nune’e bele selu tanba relasiona ho dadus presiza halo kuidadu no atensaun atu labele halo sala, bainhira prosesu pagamentu la’o ona.
“Ita demora tanba ita hein husi munisípiu hotu-hotu depois ita haruka ba Komisaun Funsaun Públika no agora ita iha ona despaisu, prosesa ba ona Ministériu Finansa, para halo pagamentu. Ita espara katak iha fulan-maiu nia-laran bele simu sira-nia saláriu ida-ne’e”, nia dehan.
Anita Tavares hateten, profesór sira ne’ebé la prense kritériu husi Ministériu Edukasaun nian, liu-liu sira laiha abiliasaun akadémika mínimu baixarelatu nian.
“Sira-ne’ebá ita bele dehan asistente, nune’e ita selu fali sira husi janeiru mak mai. Se osan iha ita selu hahú hosi janeiru maibé laiha ita selu ba oin de’it. Nune’e labele lakon saláriu ne’e, tanba sira mós iha nessidade”, nia dehan.
Diretora esplika profesór sira-ne’e laiha abilitasaun akadémika entaun dehan saida, sira-ne’e iha buat rua ne’ebé mak sira atu eskolla, ida mak indemnizasaun, se sira lakohi ona kontratu, sira eskolla kontratu, ida-ne’e mak dehan kontratu indeterminadu ho grau D. Entaun sira-ne’e hotu-hotu eskolla opsaun ne’ebé hakarak kontratu nune’e iha maiu sira sei hetan sira-nia direitu.
Kona-ba profesór indertiminadu ne’e pakote ida ho profesór ingresu espesiál. Maibé sira la prense kritériu tanba sira laiha abilitasaun akadémika, ba lisensiatura ka mínimu baixarelatu, sira-ne’e kategória grau D.
Munisípiu hotu-hotu iha, maibé la barak ida hanesan iha Liquiça iha na’in-14, no Dili mak barak iha 80-resin no seluk ladun barak.
Orsamentu Jerál Estadu (OJE) 2024, Ministériu Edukasaun (ME), $114.943.286. saláriu no vensimentu $87.431.460, bens servisu $439.854, transferénsia públiku $9.257.278, kapitál menór $1.818.693, kapitál dezenvolvimentu miliaun $5. Komitmentu $1.301.086.05 (1%), obligasaun $4.479.292.49 (4%), atuál $19.159.401.14 (17%).
Jornalista : Osória Marques
Editór: Rafael Ximenes de A. Belo
