DILI, 15 maiu 2024 (TATOLI)– Governadór Banku Sentrál Timor-Leste (BCTL-sigla Portugés), Helder Lopes, kuarta ne’e, aprezenta jestaun operasionál fundu petrolíferu iha Konsellu Ministru.
“Aprezentasaun ne’e inklui informasaun kona-ba estratéjia no implementasaun ba investimentu, alokasaun portfolio, dezempeñu investimentu, reseita Fundu Petrolíferu no mós kona-ba levantamentu Fundu Petrolíferu nian,” tenik iha nota ne’ebé Agência TATOLI asesu husi media Gabinete Primeiru-Ministru.
Notisia relevante: Asegura Fundu Petrolíferu, PM Xanana husu Governante sira gasta osan ho kuidadu
Estratéjia investimentu ba Fundu Petrolíferu ne’e gia hosi objetivu klaru ne’ebé lejizlasaun nasionál estabelese ona, ho objetivu atu asegura katak reseita ne’ebé maihusi esplorasaun petrolífera sei investe atubele garante benefísiu sustentavel tantu ba jerasaun atuál no mós ba jerasaun futura.
Enkuantu, tuir relatóriu trimestrál Fundu Mina-Rai Timór-Leste nian ne’ebé BCTL lansa ba trimestre dahuluk, Janeiru to’o Marsu, hatudu katak kapitál Fundu nian iha trimestre ikus ne’e mak biliaun $18.45 kompara ho billiaun $18.29 iha fim trimestre dahuluk hafoin ajusta tiha Fair Value dívida privada iha 2023.
Relatóriu ne’e mós hatudu katak totál reseita mak simu iha trimestre ne’e hamutuk millaun $20,46.
Rendimentu bruto husi investimentu Fundu nian hamutuk millaun $449.61 kompostu husi kupaun no dividendu ne’ebé simu mak millaun $131.83 mudansa iha valór merkadu nian millaun $317.77 iha trimestre ne’e. Ne’e rezulta rendimentu ba karteira Fundu nian durante trimestre ne’e 2.52% enkuantu rendimentu sasukat (benchmark) nian ba periodu ne’e mak 2.62%.
Lei Fundu Mina-Rai nian espesifika katak Jestór Operasional (Banco Central de Timor-Leste), mak hanesan ajente responsavel ba jestaun operasionál Fundu Mina-Rai nian.
Ministériu Finansa mak responsabiliza atu estabelese estratéjia investimentu tomak kona-ba fundu ne’e nian.
Notisia relevante:Fundu Petrolíferu biliaun $18,45 iha trimestre dahuluk 2024
Jornalista: Hortencio Sanchez
Editór : Florencio Miranda Ximenes
