BOBONARO, 10 Maiu 2024 (TATOLI) – Governu Timor-Leste (TL) liuhusi Ministra Saúde, Élia Antonia dos Reis Amarál, hasoru malu ho nia omóloga Ministru Saúde Repúblika Indonézia (RI), Budi Gunadi Sadikin, diskute koordenasaun serbisu kona-ba atu estabelese regulamentu internasionál saúde iha tempu badak hodi halo intervensaun hamutuk ba moras kontajioza ho naun-kontajioza iha fronteira nasaun rua nian.
Ministra Saúde, Élia Antonia dos Reis Amarál, esplika, governu rua halo ne’e ho objetivu atu regulariza movimentu pasajeiru iha fronteira terrestre entre munisípiu Bobonaro, Covalima no Rejiaun Espesiál Oe-Cuse Ambeno (RAEOA) ho provínsia Nusa Tengara Timur (NTT), Indonézia hodi prevene tranzisaun moras raiva no moras sira seluk.
Notísia relevante: Governu taka postu fronteira terrestre ba semana rua
“Ne’ebé ita hein ekipa tékniku sira sei halo sira-nia servisu, iha tempu badak ita bele regularize hodi foka ba moras kontajioza ho naun-kontajioza,” nia ko’alia liuhosi komemorasaun loron mundiál Tuberkuloza ne’ebe realiza iha Jináziu Maliana, sesta ne’e.
Prezidente Autoridade munisipál Bobonaro, Alexandrino Pires, esplika, munisípiu Bobonaro hela iha odamatan boot fronteira nasaun rua, nune’e fasíl tebes moras atu hada’et ba komunidade sira.
Nia hatutan, governu presiza duni servisu hamutuk ho nasaun viziñu atubele halo prevensaun sedu, molok moras sira liuliu raiva alastra no transmite mai territóriu Timor-Leste.
Enkuantu daudaun ne’e governu liuhusi Ministériu Agrikultura, Pekuária, Peska no Fooresta no Ministeriu Saúde halo hela vasinasaun ba animál asu, busa no lekirauk sira iha munisípiu fronteira sira atu prevene transmisaun virus raiva.
Notisia relevante: 2024: MS transfere pasiente 123 ba rai-li´ur no na’in-4 mate
Jornalista : Sérgio da Cruz
Editór : Evaristo Soares Martins
