DILI, 18 marsu 2024 (TATOLI)–Diretór Nasionál ba Apoiu Servisu Saúde iha Ministériu Saúde, Carlos de Carvalho Guterres, hateten iha inisiu tinan 2024 ne’e, Governu liuhosi Ministériu Saúde transfere ona pasiente hamutuk 123 ba rai-li´ur no hosi pasiente hirak ne’e iha ema na’in-haat (4) mak mate.
Notísia Relevante: Janeiru-setembru 2023: MS transfere pasiente 178 ba rai-li’ur
“Ita haruka ona 123 no mate haat. Ita sei haruka liu ida-ne’e, tanba ne’e mak presiza halo buat di’ak,” Diretór Carlos de Carvalho Moras hateten ba Agência Tatoli liuhosi programa “Entrevista Eskluziva” iha estúdiu Tatoli, Faról, segunda ne’e.
Nia garante, garante Governu agora prepara ona sentru kardiovaskulár iha Timor-Lest atu redús númeru transferénsia pasiente ba rai-li´ur tanba gastu orsamentu boot-liu.
Timor-Leste presiza apoiu parseiru sira hanesan ospitál sira-ne’ebé pasiente sira ba halo tratamentu iha rai-li´ur, bainhira sentru kardioavaskulár funsiona.
Aleinde ne’e, nia informa, iha tinan 2023 ne’e Ministériu Saúde (MS) transfere pasiente 319 ba halo tratamentu iha rai-li´ur iha 2023.
“Moras kardiovaskulár no kankru mak hetan gastu boot ba rai-li’ur no moras sira seluk, maibé kardiovaskulár mak boot liu. Ita haruka ona pasiente hamtuk 319 ba halo tratamentu ba rai-li´ur iha 2023,” nia dehan.
Pasiente sira-ne’e halo tratamentu iha nasaun tolu mak hanesan Indonézia, Malázia no Singapura, no hosi totál pasiente hirak ne’e iha ema na’in-10 mak mate.
Diretór ne’e hateten, Governu gasta orsamentu hamutuk millaun $21 hodi halo transferénsia pasiente sira ba diáspora, selu akomodasaun, prosesu tratamentu iha ospitál no tula fila kadavre mai Timor-Leste ne’e, gasta osan millaun $21 ba nasaun tolu inklui tula mate isin mai Timor-Leste.
Jornalista : Jesuína Xavier
Editór : Cancio Ximenes
