DILI, 29 janeiru 2023 (TATOLI)–Diretór Nasionál ba Apoiu Servisu Saúde iha Ministériu Saúde (MS), Carlos de Carvalho Guterres, hateten hosi Janeiru to’o setembru 2023, MS halo transferensia pasiente hamutuk 178 ba halo tratamenu saúde iha rai-li’ur.
Notísia Relevante: MS Aloka Osan Millaun Hitu Transfere Moras ba Rai-Liur Kada Tinan
“Ministériu Saúde liuhosi Dirasaun Nasionál ba Apoiu Saúde transfere ona pasiente hirak ne’e ba Indonézia, Malázia, Singapura no hosi totál númeru ne’e, na’in-neen (6) mak mate,” Carlos de Carvalho Guterres hateten ba Agência Tastoli iha Caicoli, segunda ne’e.
Tuir nia, pasiente hirak ne’e ema na’in-125 mak hala’o tratamentu saúde iha Indonézia, pasiente 38 iha Singapura no pasiente sira-ne’ebé hala’o tratamentu saúde iha Malázia ne’e hamutuk na’in-15.
Pasiente sira-ne’ebé hetan transferensia hosi Hospital Nasionál Guido Valadares (HNGV, sigla portuges) ba diáspora ne’e ho moras tipu 10 maibé barak liu ne’e pasiente moras kardiovaskulár no kankru.
Pasiente sira ho moras sira hanesan ne’e lori tempu naruk hodi hala’o tratamentu kemoterapia, maibé la rekupera fali tanba ho kondisaun saúde iha estadiun rua ba leten.
Nia sujere ba IX Governu Konstitusionál hodi hadi’a fasilidade saúde ho ekipamentu iha ospitál no sentru saúde sira hodi hamenus transferensia pasiente ba rai-li’ur, no hamenus orsamentu transferénsia ba diáspora.
Notísia Relevante: MS transfere pasiente ba rai-liur hamutuk 126 iha fulan neen nia-laran
Jornalista : Jesuína Xavier
Editór : Cancio Ximenes
