DILI, 23 agostu 2023 (TATOLI) – Xefe Departementu Apoiu Ospitalár no Ekipamentu Ministériu Saúde Emelita Agusta, dehan hahú janeiru to’o juñu, Ministériu Saúde transfere ona pasiente ho moras grave hamutuk na’in-126 ba halo tratamentu iha rai-liur.
“Hosi janeiru to’o juñu ita haruka ona pasiente hamutuk na’in-126 mak ba halo tratamentu iha Ospitál sira iha rai-liur”, Emelita dehan ba Agência TATOLI iha nia kna’ar fatin Caicoli Dili, ohin.
Nia dehan, pasiente hirak ne’e haruka ba nasaun Indonézia, Malázia no Singapura.
“Pasiente sira, ita transfere ba ne’e hetan moras hanesan, kankru, kardiolojia no sirurjia”, nia dehan.
Pasiente hirak ne’ebé halo tratamentu iha Indonézia hamutuk na’in-88, Malázia 13, Singapura na’in-25 no hosi númeru hirak ne’e na’in-lima fila hikas ona ba mundu seluk no seluk fila ho kondisaun di’ak.
“Númeru ne’ebé iha só na’in-lima mak lakon ona sira nia vida, hosi númeru ne’e feto rua no mane tolu, maibé sira seluk balu sei halo hela tratamentu no barak mak fila ona mai Timor-Leste ho kondisaun di’ak”, nia hakotu.
Jornalista: Hortencio Sanchez
Editór : Zezito Silva
