DILI, 16 maiu 2024 (TATOLI)—Centro Nacional Chega, Institutu Públiku (CNC,I.P), kinta ne’e, asina nota entendimentu ho Universidade Katólika Widya Mandira (UKWM) iha Kupang, Indonézia, ba programa rua hanesan interkámbiu entre akadémiku (peskiza no estájiu) inklui semináriu no publikasaun.
“Ami nakloke tebes simu parseria ida-ne’e, oinsá kontinua hatuur prezensa Chega iha ita-nia rai-laran no rai-li’ur, tuir akordu universitáriu sira hahú setembru tinan ne’e sei mai halo estájiu durante fulan-tolu hotu fila bá, mai fali hakerek sira-nia monografia,” Diretór Ezekutivu CNC, I.P, Hugo Maria Fernandes, informa iha salaun CNC, I.P, Balide.
Nia konsidera, akordu ne’ebé parte rua halo di’ak tebes tanba institutu ne’e nu’udar sentru arkivu sai fatin ba ema mai apreende no sei apreende mós husi ema.
Iha tinan ne’e sei hala’o atividade mak hanesan, estudante universitáriu na’in-tolu husi UKWM sei mai halo estájiu ho durasaun fulan-tolu iha CNC,I.P no bainhira hotu sei hakarek monografia ba peskiza ne’ebé sira halo.
Notísia relevante : CNC,I.P rekolla reseita $9.000-resin iha trimestre dahuluk tinan 2024
Seluk mak akadémiku sira sei mai hamutuk institutu hodi halo peskiza ba asuntu balun hodi ikus mai halo semináriu no publikasaun.
Iha biban hanesan, Reprezentante UKWM Kupang, Didimus Dedi Dhosa, konsidera, nota entedimentu ne’e importante hodi dosente sira halo peskiza iha CNC,I.P.
“Estudante ne’ebé sei mai halo estájiu ne’e, sira husi Timor-Leste, ne’ebé antes ne’e halo estudu iha UKWM. Estajiáriu internasionál ne’e hala’o tanba ami iha estúdiu ne’ebé ko’alia kona-ba programa sira hanesan siénsia polítika, siénsia komunikasaun no administrasaun públika. Ami mós sei halo peskiza hamutuk ho CNC, I.P iha aspetu sosiál, dezenvolvimentu no polítika, inklui kooperasaun serbisu ne’e sei halo publikasaun iha semináriu nasionál no internasionál,” nia tenik.
Jornalista : Arminda Fonseca
Editora : Julia Chatarina
