Uncategorized

Horta kondekora personalidade nasionál-internasionál fó kontribuisaun ba dezenvolvimentu TL

Horta kondekora personalidade nasionál-internasionál fó kontribuisaun ba dezenvolvimentu TL

Imajen/Media PR

DILI,19 maiu 2024 (TATOLI)-Prezidente-Repúblika, José Ramos-Horta, domingu ne’e,  kondekora orden Timor-Leste nian ba personalidade nasionál no internasionál na’in-63 hodi fó rekoñesimentu ba sira-nia servisu dedikadu no kontribuisaun ba dezenvolvimentu Timor-Leste.

Iha ámbitu aniversáriu da-22 ba Timor-Leste nian Loron Restaurasaun Independésia iha 20 fulan-Maiu, Xefe Estadu  fó onra nasionál ba ema na’in 63 ne’ebé simu orden Timor-Leste nian iha kategoria sira hanesan Kolár, Medalla, Insignia no Medalla Méritu.

Imajen/Media PR

Ema na’in -haat, nasionál no internasionál, hetan onra ho Orden Timor-Leste nian iha kategoria Kolár tanba sira-nia kontribuisaun boot ba dezenvolvimentu Timor-Leste nian.

Xefe Estadu mós rekoñese profesór enjeñaria na’in 12 husi Universidade Nasional Timor-Lorosa’e (UNTL) no membru seguransa privadu na’in 12 ne’ebé servisu dedika an durante tinan 20 liu ona, no ativista na’in rua husi Brigada Negra ba sira-nia aktivizmu durante Timor-Leste nia luta ba ukun rasik an. Sira hotu simu orden Timor-Leste nian iha kategoria Medalla.

Membru komunidade Diaspora no Timor-Leste hamutuk na’in-ualu rekoñese ho Orden Timor-Leste iha kategoria Insignia ba sira-nia ativizmu.

Iha kategoria ketak ida, Medalla Meritu fó ba funsionáriu sira iha servisu saúde nian-neen no funsionária sira servisu iha saneamentu hamutuk 15 ba sira-nia dedikasaun servisu desde tinan 2001, no asesor internasionál haat ne’ebé fornese kuñesimentu ne’ebe importante tebes ba iha setór legál, IT no setór marítima nian

“Personalidade ezemplár sira-ne’e, tantu belun timoroan no internasionál husi ita-nia nasaun Timor-Leste, hala’o ona papél importante hodi harii Timor-Leste ida-ne’ebé livre, pás no prosperu.” Sira -nian dedikasaun iha área oioin kontribui maka’as ba progresu demokrasia ne’ebé sei joven. Timor-Leste ho orgullu rekoñese sira-nia servisu ho onra hirak-ne’e.” refere nota imprensa ne’e.

Orden Timor-Leste nian rekoñese servisu exelente sira ne’ebé hala’o husi profisionál excepsionais sira ne’ebé fó benefísiu ba Timor-Leste no ninia povu. Nasaun ne’e halo ona navigasaun ho susesu ba dezafiu oioin no alkansa susesu boot iha área dezenvolvimentu balun, agradese ba esforsu dedikadu sira husi Titulares Orgaun Soberania Estadu nian sira, Deputadu sira Parlamentu Nasionál nian, no Governu durante sira-nia respektivus mandatu sira.

Aktu rekoñesimentu husi Prezidente ida-ne’e nu’udar símbolu apresiasaun ne’ebé kle’an ba dedikasaun no servisu sira ne’ebé ema ida-idak halo hodi hadi’ak Timor-Leste.

TATOLI

iklan
iklan

Leave a Reply

iklan
error: Content is protected !!