DILI, 26 maiu 2024 (TATOLI)-Ekipa istimadu husi Universidade Dili Institute of Technology (DIT) FC susesu iha nia jornada hodi halo terus adversáriu Nature FC ho rezultadu 10-0, iha jogu kontinuasaun faze grupu kopa Federasaun Futeból Timor-Leste (FFTL) ne’ebé realiza iha Estádiu Munisipál Dili, domingu lokoraik ne’e.
Bainhira jogu hahú ekipa rua lansa kedan kontra no atake ba malu tuir tékniku no abilidade ne’ebé iha, finta bola ba mai, pasa bola husi ain bá ain hodi hada’u sorte se loos mak atu hatama golu.
DIT hanesan ekipa ne’ebé iha esperiénsia barak, ekipa husi Liga Futeból Timor-Leste (LFTL) primeira divizaun hatudu kedan nia kbiit ne’ebé maka’as hodi lansa atake ne’ebé másimu ba ekipa istimadu husi Munisipiu Lautem Nature FC. Nature tente halo jogu ne’ebé ofensivu maibé DIT iha forsa ne’ebé extraordinariu hodi hamate tutuir jogu ne’ebé Nature halo.
Ho domina ne’ebé DIT iha, minutu 14 jogadór João Pedro (10) lansa ona golu primeiru hodi muda rezultadu ba 1-0, golu ne’e hahú fó presaun maka’as ba Nature. Nature tenta hatudu jogu brillante maibé nunka susesu iha finalidade tanba defeza DIT nian metin hanesan moru berlin.
DIT halo presaun meiu-kampo. DIT domina bola halo Nature nia jogadór halai ba mai iha kampo laran iis atu kotu maibé la aguenta ho DIT nia jogadór. Nune’e iha minutu 30 jogadór José Santos (7) lansa tan golu segundu hodi muda rezultadu ba 2-0.
Jogu manas liutan, Nature nia jogadór la kontrola bola ho másimu halo DIT domina liutan bola iha kampo laran, nune’e iha minutu 35 defezs Nature halo erru hasoru jogdór DIT árbitru deside fó penalidade. Penalidade ne’e ezekuta husai jogadór Elvis Silva (9) ikus bola tama liu rede laran muda kedan rezultadu ba 3-0.
DIT halo baralla total Nature nia jogu, DIT hatudu nia forsa halo Nature nia jogadór la kontrola ho di’ak nune’e iha minutu 39 jogadór Nature Celestino Neves (22) hatama rasik bola ba sira nia rede hodi muda DIT nia rezultadu ba 4-0. Golu ne’e halo Nature nia jogu monu liutan basa rezultadu semo dook los ona. Nature buka meiu hotu atu halo netik golu ruma maibé DIT nunka fó fatin ikus Nature nafatin hela ho rezultadu zero.
Tanba falla maka’as ona jogadór DIT utiliza oportunidade hodi hatama golu tutuir malu iha minutu 42 no 44 liu husi jogadór João Pedro hodi hanaruk DIT nia rezultadu ba 6-0.
Nune’e DIT sai forsa liutan halo Nature nonok hodi hatudu jogu ho profesionál maske laiha forss maka’as hodi hasoru DIT, to’o minutu primeira parte termina rezultadu hela provijoriu ba 6-0.
Dolar ba segunda parte DIT sai forsa liutan, loke liras jogu másimu liutan, nune’e iha minutu 52 jogadór José Ssntod lansa tan golu ida muda rezultadu ba 7-0. DIT loko-aan tanba sira forsa, nature nafatin esforsu maibé esforsu hirak ne’e hela de’it hanesan esforsu tanba la prodús golu ruma.
Maske halo golu barak ona DIT seidauk satisfaz, nafatin luta to’o minutu 52 jogadór João Pedro hatudu jogu individu ne’ebé brillante hodi prodús tan golu ida muda rezultadu ba 8-0, ho golu ne’e halo falla kedan Nature nia jogu nune’e iha minutu 72 jogadór Nature Filipe Quintão (4) tenta salva bola ne’ebé avansadu DIT nian lansa ba guarda rede maibé hamosu fali dezastre ba Nature tanba bola tama liu ba rede Nature nian aumenta DIT nia golu hodi muda rezultadu ba 9-0.
Nature nia jogu sai buradu liu, jogadór hotu laiha ona vontade jogu, tenke halo defensivu de’it hodi hein oras normal termina. Maibé DIT nafatin luta to’o minutu jogadór Judito Rego (6) kompleta DIT nia golu liu husi sutu ho kalma bola tama liu ba rede laran Nature hametin kedan rezultadu ba 10-0. Nune’e to’o minutu 90 termina vitoria prega metin ba DIT Nature hela ho derrota fila ho tristrza.
Vitoria ne’e lori kedan DIT okupa tabela klasifikassun provijoriu grupu A ho pontu haat, AS Cantada iha pozisaun segundu ho pontu tolu, terseiru okupa husi Relay FC ho pontu ida no Nature FC okupa pozisaun ikus ho pontu zero.
Jogu entre ekipa rua dirije husi árbitru prinsipál Francisco Pereira, juiz liña Filomeno da Silva, Junifelson dos Santos no árbitru rezerva Pedro Braga.
Notísia relevante: DIT FC ho Relay FC fahe pontu ba malu iha abertura kopa FFTL
Jornalista: Hortencio Sanchez
Editór: Florencio Miranda Ximenes
