iklan

Uncategorized

Governu sei dezeña polítika fó atensaun ba kondisaun UPM

Governu sei dezeña polítika fó atensaun ba kondisaun UPM

Membru governu sira observa ekipamentu membru Unidade Polísia Marítima (UPM) nian ne’ebé sira utiliza hodi halo patrullamentu no kontrola roo ilegál sira ne’ebé tama sai iha territóriu Timor-Leste iha aniversáriu UPM ba dala-21, iha Largo Lecidere, Dili, segunda (27 maiu 2024). Imajen Tatoli/Antonio Daciparu

DILI, 27 maiu 2024 (TATOLI) – Ministru Interiór, Francisco Guterres, afirma Governu sei dezeña polítika adekuada destinada ba Unidade Polísia Marítima hodi rezolve problema infraestrutura no fasilidade sira ho objetivu atu asegura seguransa tasi hodi kombate krime ilísitu no trans-nasionál sira.

“Governu hatene sei iha difikuldade barak hanesan ekipamentu no infraestrutura tanba ne’e maka IX Governu konsiente ba ida-ne’e no sei kontinua kria kondisaun ne’ebé di’ak ho gradualmente ba unidade ida-ne’e atu bele halo ninian servisu ho di’ak liu. Tanba ne’e ita sei hahú dezeña harii infraetrutura ne’ebé adekuada no kria ekipamentu adekuadu atu ita bo’ot sira halo servisu di’ak atu nune’e bele dezempña imi-nia papél ho di’ak”, Guterres dehan iha Aniversáriu ezisténsia UPM ba dala-21 iha Kuartel UPM, segunda ne’e.

Ministru ba UPM sira atu dezempeña nafatin servisu ho responsabilidade tanba rai ne’e depende ita hotu nia servisu.

“Tanba ne’e mak husu ba ita bo’ot sira dezempeñu servisu ne’ebé di’ak ho responsablidade tanba rai ida-ne’e depende mós ba ita hotu sira-nia servisu. Kuandu imi servisu ho di’ak mak buat hotu sei lao ho di’ak, husu ba UPM atu apoiu nafatin polítika Governu nian ba ekonomia azul hodi fó rendimentu ba Timor-Leste’’, katak ministru.

Ofisiál membru Unidade Polísia Maritima (UPM) halo atraksaun iha aniversáriu UPM ba dala-21, hodi hatudu sira-nia abilidade oinsá halo prevensaun ba ró ne’ebé tula sasan ilegál hodi tama iha tasi área territóriu Timor-Leste, Dili, segunda (27 maiu 2024).Imajen Tatoli/Antonio Daciparu

Iha fatin hanesan, Komandu Polísia Nasionál Timor-Leste (PNTL) rekoñese ezisténsia UPM ezisténsia sei enfrenta problema fasilidade hodi utiliza ba servisu.

“Unidade polísia mós hasoru hela dezafiu sira hanesan tuir mai, ró sira ne’ebé iha Unidade Polísia Marítima ne’ebé tuan ona no presiza iha manutensaun ne’ebé signifikativu, finansiamentu ne’ebé menus kauza insufisiente ba kombustivél, materiál ba peskas menus, formasaun ba elementu Unidade Polísia Marítima sira ne’ebé menus, akizisaun ba naviu ba Unidade Polísia Marítima ne’ebé mak laiha, sistema komunikasaun la adekuadu, problema ho fornesimentu nune’e limitasaun ba ekipamentu ba risku no salvamentu  ba membru sira iha servisu fatin hanesan ropa ne’ebé membru UPM uza hodi halo salvamentu vida ne’ebé tuan ona. Agora seidauk iha foun, nune’e mós ekipamentu ba inséndiu ne’ebé maka lafunsiona inklui ekipamentu ba seguransa sira seluk ne’ebé mak labele atu utiliza ona”, Komandante Jerál Interinu Komisáriu Polísia Pedro Belo, subliña liuhosi intervensaun iha kuartel UPM.

Komandante UPM Superintendente Polísia, Eugénio Pereira, afirma UPM iha ekipamentu ida naran Automatic Identification Sytem (AIS) ne’ebé bele halo identifikasaun atividade iha área kosteira Timor-Leste no For Sky Ligth no Maritime Traficking Service. Ekipamentu sira ne’e mak ajuda UPM halo kontrolu ba movementu ró sira iha área ne’ebé konsidra hanesan domíniu marítima Timor-Leste nian.

“Agora daudaun UPM tau importánsia ba formasaun no kapasitasaun ba membru sira  liuliu iha área navegasaun no fó formasaun ba sira kona-ba lejislasaun, kovensaun internasionál marítima nian no oinsá buska no salvamentu”, nia subliña.

Nia dehan, Komandu UPM mós prepara hela nia rekursu sira hodi tuir kursu tékniku sobrevivénsia ninian liuliu fó seguransa ba ró ne’ebé instala ba kabu submariñu.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!