DILI, 29 maiu 2024 (TATOLI) – Diretór Operasaun no Manutensaun Bee no Saneamentu BTL,E.P Aleixo do Santos, informa Bee Timor-Leste fó prioridade ba zona tolu, iha tinan ne’e, tanba durante ne’e susar asesu ba bee moos iha Dili.
“Iha tinan ida-ne’e, ita tau prioridade ba zona tolu hanesan zona 1, zona 10 no zona 11 atu mellora di’ak liután, nune’e komunidade sira bele asesu bee moos ho di’ak, tanba sira durante susar atu asesu bee moos, entaun ida-ne’e mak ita hakarak jere hanesan ne’e pelumenus faze ba faze to’o iha zona sira ne’ebé mak iha”, Aleixo ba TATOLI iha nia kna’ar fatin Caicoli, ohin.
Nia Dehan, BTL planeia atu konsentra ba iha Comoro Rai kotu, Tasi-Tolu, BJ Habibie to’o Cristo Rei no Hera.
“Ita planu ida-ne’e, ita konsentra ba zona 1 ne’e, ba área Comoro ba to’o iha área Rai-Kotu no mós to’o iha Tasi-Tolu, zona 10 komesa hosi ponte Bj Habibie to’o iha Cristo Rei no zona 11 iha parte Hera, tanba sa ita fó prioridade ba ida-ne’e tanba ita hatene katak rekursu ida ne’ebé hanesan indepedente lakahur ho sistema seluk ne’ebé mak mai hosi tratamentu bee nian ne’ebé mai hosi bee rai okos. Entaun zona 1 iha perfurasaun hamutuk lima ne’ebé ita sei kanaliza no ita sei instala ba ita komunidade sira pelumenus sira tenke asesu bee tuir planu ne’ebé mak iha”, nia afirma.
Nia esplika, iha zona 10 sei halo perfurasuan haat iha ne’eba, atu nune’e bele kanaliza ba komunidade sira iha ‘area ne’eba. Nune’e ba zona 11 ita sei halo perfurasuan hotu.
“Entaun hakarak atu asegura iha ne’eba pelumenus liberta ida-ne’e hodi ita muda fila fali ba zona sira seluk. Lasignifika ita konsentra iha ne’e no zona sira seluk ita atu husik, ida-n’e lae, maibé ita nafatin hamutuk ho tékniku sira atu bele kontinua servisu nune’e bele halo ligasaun monta kontadór sira ne’e ba ita-nia komunidade sira ne’ebé durante seidauk tau kontadór entaun ida-ne’e mak sai prioridade ba tinan ida-ne’e ita sei halo”, nia konklui
Jornalista : Felicidade Ximenes
Editór : Zezito Silva
