Uncategorized

PNTL detein suspeitu na’in-rua ne’ebé halakon Januario nia vida 

PNTL detein suspeitu na’in-rua ne’ebé halakon Januario nia vida 

Komandante Sup Xefe Munisípiu Dili, Orlando Gomes. Imajen Tatoli/Francisco Sony

DILI, 03 juñu 2024 (TATOLI) – Komandante Polísia Nasionál Timor-Leste (PNTL), Munisípiu Dili, Superintedente Xefe Polísia, Orlando Gomes, dehan PNTL Eskuadra Dom Aleixo, detein suspeitu ho inisiál TF no J tanba envolve iha kazu hakotu vítima Januario nia vida.

Kazu ne’e akontese iha sesta (31/5) iha tuku 23:00 kalan bainhira vítima Januario ho nia kolega ho motór hosi diresaun Beduku atu mai iha Ponte CPLP Comoro, bainhira vítima na’in-rua foin atu besik ba ponte derepente joven sira iha área ne’ebá tuda vítima sira.

Vítima na’in-ida monu ba rai no vítima ida seluk hetan baku ho ai balok depois rezulta vítima na’in-rua monu hotu ba rai.

Hafoin akontesimentu, PNTL Eskuadra Dom Aleixo no polísia tránzitu ba kedan lokál krime hodi telefone ambulánsia hodi foti vítima sira ba Ospitál Nasionál Guidu Valadares (HNGV) Dili hodi halo tratamentu.

Maibé iha sábadu (02/6) dader, vítima ho naran Januario mate tanba hetan pankada makas iha ulun tanba hetan tuda no baku ho ai Balok.

“Agora daudaun ita detein ona suspeitu sira ba kazu ne’e, iha suspeitu na’in-rua, ida ho inisiál TF no J mak ita detein ona iha sela Komandu PNTL Dili hodi submete ba oras 72 molok aprezenta ba Ministériu Públiku tuir prosesu Primeiru Interogatóriu iha Tribunál”, Superintedente Xefe Polísia Orlando Gomes hateten ba jornalista sira iha Komandu PNTL Dili Caicoli, Segunda, ohin.

Komandante Orlando hateten, motivu hosi kazu ne’e, seidauk hatene lolos tanba sá maka akontese tanba sei iha hela prosesu investigasaun.

“Motivu ba kazu ida hosi parte investigadór sira agora daudaun halo hela investigasaun depois mak ita hatene motivu ba kazu ida-ne’e saida, maibé ba kazu ne’e dala ruma iha problema partikulár ruma, tanba ne’e kuandu ita-nia vítima sira ne’e liu mak suspeitu sira ne’e tuda”, nia adianta.

Komandante ne’e informa liután, PNTL mós rekolla evidénsia sira ne’ebé suspeitu sira uza hodi halo asaun hasoru vítima na’in-rua.

“Ita mós asegura evidénsia sira ne’ebé suspeitu sira uza hodi halo asaun hasoru vítima sira kona-ba evidénsia saida mak ami rekolla iha fatin, ha’u labele fó sai ba ita bo’ot sira, maibé ita asegura hotu ona evidensia sira ne’e depois ita aprezenta ba Ministériu Publiku”, nia konklui.

Jornalista: Natalino Costa

Editór : Zezito Silva

 

iklan
iklan

Leave a Reply

iklan
error: Content is protected !!