INKLUZAUN SOSIÁL

Sentru Nasionál Reabilitasaun Becora fó ona atendimentu ba EhD 6.603

Sentru Nasionál Reabilitasaun Becora fó ona atendimentu ba EhD 6.603

Diretór Jerál Sentru Nasionál Reabilitasaun (CNR, siglá portugés) Becora, Alexandre Morais. Imajen/TATOLI.

DILI, 06 juñu 2024 (TATOLI)—Sentru Nasionál Reabilitasaun (CNR, siglá portugés) Becora, hahú estabelese iha 2005 to’o agora ne’e fó ona atendimentu ba Ema ho Defisiénsia (EhD) fiziku iha territóriu hamutuk 6.603.

“Desde inísiu harii sentru ne’e até juñu tinan ne’e, ita fó ona atendimentu ba ita-nia maluk ema ho defisiénsia ne’ebé mai husi munisípiu oioin,” Diretór Jerál Sentru Nasionál Reabilitasaun (CNR, siglá portugés) Becora, Alexandre Morais, hateten liuhusi programa “Entrevista Eskluziva” iha estúdiu Agência Tatoli, iha Faról, kinta ne’e.

Atendimentu ka asisténsia ne’ebé Sentru Nasionál Reabilitasaun daudaun ne’e fó ba ema ho defisiénsia fíziku sira ba serbisu reabilitasaun mak fornesimentu kadeira roda, ai-tonka no material ba produsaun liman no ain falsu, terápia ko’alia foka ba labarik sira, fisioterápia, apoiu espesiál ba ema ho defisiénsia hanesan kama no roda.

Sentru Nasionál Reabilitasaun Becora iha programa seluk mak fó apoiu ba labarik sira ho defisiénsia ne’ebé iha kompromisu ba eskola hodi fasilita asesu ba eskola, apoiu materiál no finanseiru.

“Ema hotu-hotu iha direitu goza nia moris ne’e, ita tenke fasilita uluk nia mak nia bele goza nia moris. Tanba nia iha tiha ona limitasaun, entaun atu hasai limitasaun ne’e ita tenke kria kondisaun ba sira,” nia hateten.

Aleinde ne’e, nia dehan, atendimentu iha sentru no sentru mós halo akompañamentu no monitorizasaun ba ema ho defisiénsia sira ida-idak nia família.

Tuir nia, Sentru Nasionál Reabilitasaun Becora halo atendimentu reabilitasaun ne’ebé hala’o ba ema ho defisiénsia ida-ne’e la’ós rekopera totál maibé halo mudansa ka prevensaun uitoan kondisaun labele sai aat liu no atendimentu ne’e ninia síklu kontinua la’o.

Dadaun ne’e, Sentru Nasionál Reabilitasaun Becora iha funsionáriu hamutuk 110, maibé ninia tékniku iha área espesialidade iha ema na’in-26 de’it hodi atende ema ho defisiénsia (EhD) sira.

Difikuldade ne’ebé durante ne’e Sentru Nasionál Reabilitasaun mak prosesu akizisaun materiál ba ema ho defisiénsia (EhD) sistema aprovizionamentu la’o kle’ur ba,fatin ka espasu internamentu kiik, rekursu umanu menus, ba difikuldade sira-ne’e sentru buka solusiona husi tempu ba tempu.

Nia apela ba sosiedade labele diskrimina ema ho defisiénsia (EhD) no husu família sira-ne’ebé iha família ho kondisaun defisíensia fíziku atu lori ba sentru nasionál reabilitasaun hodi bele hetan atendimentu husi serbisu reabilitasaun.

Sentru Nasionál Reabilitasaun ne’e ninia kna’ar fatin iha Becora no harii iha tinan 2005 no momentu ne’eba organizasaun naun governamentál lokál ida mak harii sentru ne’e, maibé depois la’o husi períodu ba períodu no Governu mós fó apoiu orsamentu ba serbisu sentru ne’e nian.

Nune’e, Governu iha kompromisu katak serbisu atendimentu sira hanesan ne’e mós importante, atu nune’e Governu tau matan ho másimu hodi nune’e haforsa serbisu sentru ne’e di’ak liután mak oinsá fó atendimentu ba ema ho defisiénsia sira.

Ho nune’e, iha tinan 2013, Governu kria dekretu-lei númeru 37/2012, hodi muda estatutu sentru ne’e sai fali instituisaun Governu nian ne’ebé mak tutela direta ba Ministériu Solidariedade Sosiál no Inkluzaun (MSSI), ho nia estatutu autónomu, administrativamente no finanseiru jere rasik ninia rekursu atu bele fó atendimentu ba ema ho defisiénsia sira.

Sentru Nasionál Reabilitasaun nia kna’ar prinsipál mak oinsá fó atendimentu espesiál ema ho defisiénsia sira liuliu ba ekipamentu mobilidade sira, iha parte seluk fisioterápia, terapia foku ba ema ho defisiénsia ho kondisaun fíziku, apoiu kadeira roda no seluk tan.

Iha tinan ne’e, Sentru Nasionál Reabilitasaun (CNR, siglá portugés) hetan alokasaun Orsamentu Jerál Estadu (OJE) 2024 millaun $1-resin hodi kobre ba nesesidade atendimentu ba ema ho defisiénsia (Ehd) sira.

Notísia Relevante: Governu iha kompromisu atu establese Sentru Nasionál Reabilitasaun iha Baucau

Jornalista : Nelson de Sousa

Editór       : Cancio Ximenes    

iklan
iklan

Leave a Reply

iklan
error: Content is protected !!