iklan

Uncategorized

MOP selebra akordu ho Empreza Montana Diak reabilita estrada Turiscai ba Maubisse

MOP selebra akordu ho Empreza Montana Diak reabilita estrada Turiscai ba Maubisse

Ministru Obras Públika Samuel Marcal akompaña hosi autoridade lokál sira hosi Postu Administrativu Turiscai no Maubisse Selebra Kontratu ho empreza Montana Di'ak ba projetu reabilitasaun estrada Diresaun Turiscai ba too Postu Administrativu Maubisse.Foto Natalino Costa.

MANUFAHI, 13 juñu (TATOLI) – Ministru Obras Públika (MOP) Samuel Marcal, selebra kontratu ho Empreza Montana Diak Unipessoal Lda ba projetu reabilitasaun estrada diresaun hosi Postu Adminiatrativu Turiscai, Munisípiu Manufahi to’o Postu Administrativu Maubisse, Munisípiu Ainaro.

“Ohin ita asina kontratu ho Empreza Montana Diak ba reabilitasaun estrada Turiscai liga ba Postu Administrativu Maubisse. Ita bo’ot sira hatene estrada Turiscai ne’e kondisaun aat no grave, entaun ho selebrasaun kontratu ida-ne’e fó esperansa ba povu Turiscai katak Governu la taka matan ba povu Turiscai no hahú lori dezenvolvimentu ba povu Turiscai”, Ministru Samuel Marcal hateten ba jornalista sira hafoin serimónia selebrasaun kontratu iha Salaun Binani, Administrasaun Postu, kinta, ohin.

Nia dehan, orsamentu ba projetu reabilitasaun estrada ho montante millaun $3.4, no projetu ida-ne’e implementa ho durasaun tinan ida.

“Ita fó tempu fulan ida ba empreza atu mobiliza nia ekipamentu pezadu mai iha ne’e para hahú ona projetu ne’e no projetu reabilitasaun estrada Turiscai ne’e tenke tuir nia tempu”, nia afirma.

Governante ne’e husu ba povu atu kontribui ba projetu ne’e no labele halo impedimentu ba empreza ne’ebé halo projetu ne’e atu projetu reblitasaun estrada lao tuir nia tempu ne’ebé determina.

“Husu ba komunidade sira iha Turiscai, favor kontribui ba projetu ida-ne’e. Ha’u husu ba autoridade sira, xefe suku sira iha Turiscai atu kontribui ita-nia dezenvolvimentu bele lao di’ak”, nia dehan.

Iha fatin hanesan, Vise Ministru asuntu Parlamentár, Aderito Hugo, hateten prezensa ida-ne’e hanesan oportunidade ida atu sai sasin ba selebrasaun kontratu.

“Estrada Turiscai ba Maubisse ne’e aat desde ulu inklui estrada sira seluk iha Munisípiu Manufahi, maibe Governu hahú tau importánsia hodi hadia estrada Turiscai no ha’u hola parte, ohin sai sasin ba asina kontratu Governu ho empreza ba reblitasaun estrada Turiscai. Rai Turiscai nudar fatin moris Proklamadór Francisco Xavier do Amaral, ho reabilitasaun estrada ida-nee, ita fó valorizasaun ida ba ita-nia proklamadór no Turiscai oan sira katak sira nia sofrimentu hahú ohin Governu rezolve ona”, nia haktuir.

Nia dehan, IX Governu iha kompromisu atu halo reabilitasaun ba estrada sira iha Timor laran tomak.

Diretór Empreza Montana Diak, Lay Fu Sene, kompromentidu sei halo projetu estrada Turiscai ba Maubisse ho di’ak no kualidade no sei halo projetu ne’e tuir kontratu ne’ebé iha.

“Ami sei halo projetu ne’e ho kualidade no termina tuir kontratu ne’ebé iha ona”, nia haktuir.

Autoridade Munisipál Manufahi no Ainaro agradese ba MOP

Iha biban ne’e, Prezidente Autoridade Munisípiu Manufahi, Luis Tavares, kongratula ba Governu sentrál tanba bele fihir Turiscai hodi bele hadia estrada iha Turiscai atu fasilita povu Turiscai nia movimentasaun.

“Ho reabilitasaun estrada ida-ne’e, povu Turiscai hahú sente dezenvolvimentu tanba ne’e husu ita hotu tenke kontribui ba prosesu dezenvolvimentu ne’ebé lao iha ita nia postu no suku atu dezenvolvimentu bele lao di’ak”, nia afirma.

Nune’e mós, Prezidente Autoridade Munisípiu Ainaro Manuela Georgina Carmo Bucar Cortereal, dehan reabilitasaun estrada hosi Turiscai ba Maubisse ne’e importante tanba bele fasilita konetividade komunidade hosi Turiscai ba Maubisse.

“Hosi Turiscai bele ba faan sira-nia produtu iha Maubisse no hosi Komunidade Maubisse bele faan sira nia produtu sira mai Turiscai”, nia salienta.

Nia husu ba ema hotu atu labele halo impedimentu ba projetu ida-ne’e.

“Maibé labele halo impedimentu ba ita-nia projetu, husu autoridade suku atu haree ida-ne’e”, nia fó hanoin.

Xefe Suku Beremana Orlando Soares, reprezenta komunidade Turiscai hato’o agradesimentu ba Ministériu Obras Públika ne’ebé asina kontratu ho Empreza Montana Diak hodi hadia estrada iha Turiscai ba Maubisse.

“Estrada ida-nee fo benefísiu ba povu iha Turiscai no suku lima iha Maubisse nian. Kuandu estrada ne’e di’ak, ami hosi Turiscai bele ba faan ami nia tua mutin hosi Turiscai ba Maubisse no hosi Maubisse bele faan repollu mai iha ne’e”, nia konklui.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!