iklan

HEADLINE, KAPITÁL

Empreza Nuclear ho AMD disponibiliza formasaun atu operasionaliza fasilidade RSU

Empreza Nuclear ho AMD disponibiliza formasaun atu operasionaliza fasilidade RSU

Fatin Lixu iha Caicoli. Imajen Tatoli/Egas Cristóvão

DILI, 24 juñu 2024 (TATOLI) – Empreza Nuclear hamutuk ho Autoridade Munisípiu Dili fó ona formasaun ba operadór 15 atu utiliza ekipamamentu Rezíduo Sólidu Urbana (RSU) hodi raut foer iha Dili.

“Formasaun ida-ne’e kona-ba oinsá preparasaun Governu nian ba operasaun ekipamentu RSU ne’ebé atu implementa iha Dili”, Tékniku ba formasaun ekipamentu RSU China Nuclear, Zhong Wen, informa ba jornalista sira iha AMD Matadoru, ohin.

Nia dehan, matéria ne’ebé mak aprezenta iha formasaun ne’e mak oinsá atu halo operasaun ba  ekipamentu sira ne’ebé mak atu rekolle lixu iha Dili.

“Iha formasaun ne’e oinsá ita-nia operadór sira bele utiliza ekipamentu ho didiák hodi rekolla lixu iha Dili”, nia esplika.

Nia relata, formasaun ida-ne’e atu hatene ekipamentu sira, oinsá atu utiliza, maibé atu klean liu, sei iha formasaun diák ba sira, maibé ohin ne’e hanesan koñese de’it ba fasilidade sira ne’e oinsá atu halo operasaun no manutensaun.

Iha fatin hanesan, Diretór Servisu Munisipál Água no Saneamentu iha Autoridade Munisípiu Dili (AMD), Domingos Godinho, hateten formasaun ida-ne’e fó ba operadór sira ne’ebé mak atu utiliza ekipamentu RSU hodi raut lixu iha Dili.

“Formasaun ida-ne’e hanesan etapa dahuluk ba operasaun ba koleksaun nian, entaun ita halo uluk formasaun ba ita-nia operadór sira, tanba sira ne’e laos funsionáriu AMD, maibé mai hosi  Empreza Nuclear, entaun ohin sira fó formasaun ba operadór 15, tanba ne’e tuir planu Governu nian katak fulan-Jullu, hahú halo ona operasaun ba kolesaun lixu iha Dili”, Godinho hateten.

Godinho dehan, formasaun ida-ne’e durante loron rua, hahú ohin no aban, atu operadór sira bele hatene klean kona-ba oinsá utiliza ekipamentu sira.

“Ohin fó formasaun aban sira ba Tibar hodi kaer no haree rasik ekipamentu sira, nune’e to’o tempu sira bele utiliza hodi hala’o atividade raut lixu iha kapitál Dili”, nia konklui.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!