ME prontu hatán iha Tribunál relasiona kona-ba preokupasaun antigu profesór kontratadu
DILI, 27 juñu 2024 (TATOLI)— Ministériu Edukasaun (ME) prontu hatán iha Tribunál bainhira antigu profesór kontratadu 2023 no profesór reklamante sira levanta sira-nia problema.
“Karik profesór sira halo demonstrasaun no hakarak lori problema ne’e ba Tribunál, dalan ida-ne’e mak sira foti, ne’e nasaun demokrátika entaun ne’e iha liberdade atu sira espresa hanoin, karik buat ruma la justu iha ita-nia rai no iha ministériu balun, ne’e la’ós problema. Ministériu Edukasaun prontu atu ba hatán, saida mak ita-nia antigu profesór kontratadu sira hakarak ezije ba Tribunál, importante mak Ministériu Edukasaun labele sai husi koridór dekretu ne’ebé mak iha,” Ministru Edukasaun interinu, Domingos Lopes Lemos, informa iha salaun ME, Vila-Verde, kinta ne’e.
Notísia relevante : KNPK-TL ezije PM orienta ME ezekuta rezolusaun PN
Nia dehan, maski ba Tribunál ne’e la’ós solusaun ba problema antigu profesór kontratadu sira, maibé se hakarak lia loos husi parte rua ne’e hotu maka ME prontu hatán iha Tribunál.
“Se ida-ne’e mak sira hakarak no deside ita agradese tanba bele hetan solusaun mós iha ne’ebá, no ita hotu-hotu mós iha lei nia okos,” nia akresenta.
Dalan di’ak ne’ebé ME hatán ba problema antigu profesór kontratadu mak bolsa kandidatu ne’ebé daudaun ne’e la’o hela, nune’e husu ema hotu-hotu mai hola parte.
“Dalan ne’ebé ami hatán ba antigu profesór kontratadu sira-nia problema liga ba dekretu-lei 31/2023 mak ami loke bolsa kandidatu. Nune’e husu ba antigu profesór kontratadu sira hotu atu mai partisipa,” nia tenik.
Tanba dalan di’ak atu rezolve edukasaun iha rai-laran mak profesór sira hotu tenke liuhusi teste.
“Ita bolu de’it entaun ema hotu-hotu hakarak atu mai serbisu, Ministériu Edukasaun la’ós fatin atu buka serbisu maibé fatin atu ba eduka no kontribui,” nia dehan.
Dekretu-lei sira mak hanesan Nú. 32, 33 no 34/2023 iha loron 31 maiu kona-ba sistema nasionál ba ensinu báziku, ensinu sekundáriu no edukasaun pré-escolar, determina iha sira-nia artigu 81.ᵒ, nú 1; 89.ᵒ, Nú.1 no 78.ᵒ, nú 1 respetivamente.
Dekretu-lei iha leten proibisaun ka bandu estabelesimentu edukasaun no ensinu públiku sira atu kontrata kualker individu atu ezerse karakter administrativu iha eskola sira. Ida-ne’e signifika katak, ME proibidu atu kontrata agente administrativu públiku sira atu dezenpeña kargu profesór iha estabelesimentu edukasaun no ensinu.
Jornalista : Osória Marques
Editora : Julia Chatarina
