iklan

MUNISÍPIU, VIQUEQUE

Komunidade uma-kain 82 iha Afaloikai ladauk asesu bee-moos no eletrisidade

Komunidade uma-kain 82 iha Afaloikai ladauk asesu bee-moos no eletrisidade

Xefe suku Afaloikai, postu administrativu Uatucarbau, Abilio Soares.Imajén Tatoli/Vitorino Lopes da Costa

VIQUEQUE, 08 jullu 2024 (TATOLI)- Xefe suku Afaloikai, Postu Administrativu Uatucarbau, munisípiu Viqueque, Abilio Soares, informa komunidade hamutuk uma-kain 82 to’o agora seidauk asesu bee-moos no eletrisidade.

Iha suku ne’e, aldeia ne’ebé seidauk asesu ba bee-moos no eletrisidade maka Aldeia Lacohu no  Lacoala ne’ebé iha populasaun hamutuk 278 husi uma-kain 82.

Tuir dadaús populasaun suku Afaloikai   iha aldeia aldeia haat  hanesan Lacohu,  Darlari, Caiualita  Lacoala ho abitante hamutuk 1.939 husi uma-kain 365.

“Ha’u-nia komunidade aldeia rua totál uma-kain 82 ne’ebé durante ne’e,  sira tuur iha nakukun laran tanba  seidauk asesu eletrisidade nomós seidauk asesu ba bee-moos. Komunidade sira atu asesu bee-moos sira tenke la’o distánsia metru 100-resin hafoin kuru bee mota hodi konsumu loron-loron”,  Abilio Soares, hateten ba Agência TATOLI, ohin.

Maske, iha Planu Estratéjiku Dezenvolvimentu Nasionál (PEDN) 2011-2030 katak povu Timor Leste hotu-hotu asesu ba bee no eletrisidade.

“Maibé, ohin loron ita haree povu sira-ne’ebé moris iha área rurál seidauk sente ba dezenvolvimentu no  bainhira loos maka povu bele asesu ba eletrisidade no bee-moos bazeia planu sira-ne’e Governu tau ona ba planu PEDN”, nia kestiona.

Tanba ne’e, nia  rekomenda ba Governu hodi fó atensaun ba problema sira hanesan bee-moos,  eletrisidade no estrada sira-ne’ebé liga ba área rurál  tanba ho kondisaun aat presiza hadi’a atu povu bele asesu ho di’ak.

“Ha’u reprezenta povu Afaloikai hakarak husu ba Governu dada eletrisidade no bee-moos ba komunidade sira hodi asesu tanba tinan barak sira terus. Presiza Governu ninia atensaun hodi rezolve povu nian preokupasaun sira-ne’e”, nia sujere.

 Notisia relevante: PAM Francisco Cruz hakarak promove partisipasaun povu hodi dezenvolve Viqueque

Jornalista   : Vitorino Lopes da Costa

Editór         : Florêncio Miranda Ximenes

iklan
iklan

Leave a Reply

iklan
error: Content is protected !!