DILI, 08 jullu 2024 (TATOLI) – Diretór Servisu Apoiu Diagnóstiku no Terapeútiku iha Hospitál Nasionál Guido Valadares (HNGV), Vidál de Jesus Lopes, hateten pasiente sira ne’ebé mate iha HNGV kada loron, ekipa sira halo hela prosesu investigasaun nia laran.
“Dahuluk HNGV nakloke ba krítika hotu, maibé ho karatér konstrutiva atu hadia servisu hodi fó atendementu ida ne’ebé di’ak liután maibé preokupasaun husi públiku ka individu kestiona sistema ka lalaok servisu HNGV nian hodi fó sai husi mortuariu nian ne’ebé dehan ema mate barak, entaun ekipa halo prosesu investigasaun nia laran ona”, Vidál de Jesus Lopes informa iha nia kna’ar fatin HNGV, ohin.
Nia esplika, foto ba ema mate ne’ebé mak espalla iha media sosiál, ne’e foto tuan ka foun, entaun presiza investiga aatu bele hatene no hato’o ba parte kompotente sira atu haree.
“Foto sira fó sai ne’e foun ka antigu nian, se foun, ami mós persiza investiga hodi hatene ninia informasaun lolos, karik iha ami-nia investigasaun lolos mak identifika lakuna balun iha ne’eba, ami sei kanaliza ba parte jurídiku nian hodi kanaliza ba parte kompetente sira atu haree ba oin”, nia informa.
Nia revela, ba krítika hotu tenke ho konstrutivu, bazeia bae vidénsia, dadus, faktu, la’os halo propaganda.
“Ami simu nafatin krítika sira ne’e, maibé krítika sira ne’ebé konstrutiva, bazeia ba evidénsia, bazeia ba dadus, bazeia ba faktu, bainhira ema krítika, ami haree ida-ne’e loos duni ami rekoñese. Maibé ida ne’ebé mak ami sente laloos, nu’udar instituisaun Governu nian ami mós iha autoridade halo klarifikasaun ba públiku katak informasaun sira ne’e los ka laloos. Maske akontese iha HNGV rasik, ami mós persiza halo investigasaun, iha ekipa auditoria no parte jurídiku halo ona nia servisu hodi buka hatene lolos, tanba HNGV rasik mós labele partilla informasaun ka halo klarifikasaun ne’ebé atu defende an de’it la bazeia ba evidénsia ruma, maibé situasaun sira ne’e hotu iha prosesu nia laran hela”, nia relata.
Nia esplika, informasaun kona-ba ema mate loroloron, médiku sira kontinua atualiza, maibé ba informasaun iha media sosiál, persiza halo identifikasaun ba foto, atu nune’e bele identifika lolos foto foun ka antigu. Tanba pasiente sira ne’e mai ho kondisaun grave ona.
“Ita-nia pasiente sira ne’ebé mate laiha ligasaun ho estoke ai-moruk, ezemplu: pasiente ho idade 94 mai ho komplikasaun moras, entaun ida-ne’e ita labele salva sira-nia vida”, nia konklui.
Jornalista : Felicidade Ximenes
Editór : Zezito Silva
