DILI, 10 jullu 2024 (TATOLI)—Primeiru-Ministru (PM), Kay Rala Xanana Gusmão, kuarta ne’e, ho membru Governu sira, hafoin ramata reuniaun Konsellu Ministru (KM), halo kedas vizita iha Portu Dili, ne’ebé nu’udar fatin ba komemorasaun loron konsulta populár ba dala-25.
“Ohin Primeiru-Ministru mai iha Portu Dili ne’e hodi halo observasaun fatin ba komemorasaun loron konsulta popular 30 agostu ba dala-25,” Ministru Transporte no Komunikasaun, Miguel Marques Manetelu, informa iha Portu Dili.
Governante ne’e dehan, Xefe Governu halo vizita dahuluk ba fatin ne’e no iha tenpu hanesan orienta hela Ministériu Administrasaun Estatál (MAE) atu halo dezeñu di’ak ba fatin preparasaun komemorasaun loron istóriku.
Notísia relevante : Empreza Irmão Sandobe reabilita edifísiu parajen iha Portu Dili
Governu antes ne’e halo ona planu dezenvolvimentu ba transformasaun Portu Dili, husi fatin deskargamentu merkadoria husi rai-li’ur sai zona turístika no portu kruzeiru sira.
Konsellu Ministru iha tinan kotuk halo ona aprovasaun ba planu investimentu ida-ne’e, ne’ebé nia prosesu la’o hela no USAID halo hela estudu viabilidade.
Projetu ne’e ho modalidade Parseria Públiku-Privada (PPP) ho kustu estimativu millaun $50-resin atu transforma Portu Dili sai hanesan pontu turizmu ne’ebé sei inklui ekipamentu kulturál, rekreativu no rezisténsia.
Investimentu ne’e sei kria empregu no fornese oportunidade komersiál ba rezidente sira iha Dili, halo kapitál sai furak liután hodi bele atrai turista doméstika no internasionál iha futuru.
Jonalista : Arminda Fonseca
Editora : Julia Chatarina
