DILI, 11 jullu 2024 (TATOLI) – Uniaun Europeia (UE) no Sentru Komérsiu Internasionál (ITC, sigla inglés) halo kooperasaun ho TradeInvest Timor–Leste, fó formasaun ba pontu vokál husi liña ministeriál sira atu prepara tanba Timor-Leste ofisialmente sai membru ba Organizasaun Mundiál Komérsiu (OMK) no sei adere ba Asosiasaun Nasaun Sudeste Aziátiku (ASEAN).
Xefe Kooperasaun Uniaun Europeia, Lotam Lerer, hateten ITC agora daudaun implementa hela projetu tinan tolu iha Timor–Leste, ho títulu “Apoia Integrasaun no Komérsiu Rejionál’’. Ho ida -ne’e finansia hosi Uniaun Europeia, ho objetivu atu hametin integrasaun ekonómika no komérsiu Timor-Leste nian, tantu iha nivel mundiál.
“Ami hein katak formasaun ida-ne’e, ekipa sira iha koñesimentu di’ak liután atu foti desizaun ne’ebé sei forma ba futuru ekonómiku ho adezaun OMK ho susesu tanba ne’e, Uniaun Europeia fiar katak Timor–Leste iha pozisaun di’ak atu sai no membru ASEAN iha tinan oin”, Lotam Lerer hatete ba jornalista iha eskritóriu TeadeInvest nian, Colmera, Dili, ohin.
Iha fatin hanesan, Diretór interinu TradeInvest nian, Izaquel Babo, agradese ba UE no ITC nia apoiu ba formasaun fasilita investimentu nian, hanesan ida hosi preparasaun Timor-Leste nian iha adezaun ba ASEAN.
“Objetivu hosi formasaun ne’e atu fornese análize komparativu kona-ba akordu relasiona ho fasilitasaun investimentu ho prosesu adezaun OMK no ASEAN nian”, Izaquel Babo dehan.
Formasaun ida-ne’e durante loron rua, hahú husi 11 to’o 12, fulan-Jullu iha eskritóriu TradeInvest ne’ebé hetan partisipasaun husi pontu vokál interministerial sira hamutuk 30 mai hosi Ministériu Finansa, Ministériu Komérsiu no Indústria, Ministériu Ekonomia no Ambientál, Alfándega, SERVE no Ministériu sira seluk ne’ebé iha relasaun ho OMK.
Jornalista : Felicidade Ximenes
Editór : Zezito Silva
