DILI, 15 jullu (TATOLI) – Padre Pároku Ainaro, Eugénio Redentor Fátima husu ba funsionáriu públiku hotu atu servi povu ho fuan no onestidade atu lori povu ba moris di’ak.
“Hanesan funsionáriu públiku mak ne’e, tenke hatudu espiritu servidór, sai funsionáriu públiku tenke servisu ba povu ho fuan, loialdade no onestidade”, Padre Eugénio hateten iha nia omília bainhira prezide misa agradesimentu loron nasionál Funsaun Públika públika iha Igreja Ainaro, segundu ne’e.
Padre hateten, ohin loron ema lakon espiritu servi ho voluntáriu atu tulun ema.
“Mundu ohin lron halo ema ema haree hakarak sai funsionáriu públiku hotu oinsá atu garante vida moris ba futuru maibé lakohi ona atu servi ho voluntáriu, tanba ne’e iha biban ida-ne’e husu funsionáriu sira tenke sai servidór ne’ebé hodi lori moris di’ak ba povu”, nia releva.
Eugénio subliña, tema sentrál ba komemorasaun loron nasionál Funsaun Públika tinan ne’e mak hametin espiritu nasionalizmu no patriotismu hodi tane aas étika profisionál hodi servi povu ho nasaun.
“Tema ba komemorasaun Funsaun Públika ba tinan ne’e importante tebes atu afirma katak funsionáriu ka ajente administrasaun públika tenke presta servisu ne’ebé di’ak hodi sai servidór ba povu no nasaun ida-ne’e hodi lori povu ba moris di’ak no dezenvolve instituisaun ho di’ak, sai servidór públiku labele hanoin atu servi ita nia aan no ita- nia família, maibé hanesan ffunsionáriu ne’e nu’udar dedikasaun hodi servi”, nia dehan.
Nia fó parabens ba funsionáriu tomak iha timor laran ne’ebé komemora loron Funsaun Públika ba dala-10 ho komemorasaun ne’e funsionáriu sira bele servi povu ho di’ak liután.
“Tinan sanulu ne’e naton ona para funsionáriu hotu atu hader husi toba fatin hodi servisu”, nia kongratula.
Iha fatin hanesan, Prezidente Komisaun Funsaun Públika Agostinho Letêncio de Deus , husu ba funsionáriu sira atu presta servisu ne’ebé di’ak liu ba povu.
“Funsionáriu tomak ho komemorasaun loron nasionál Funsaun Públika públika ba dala 10 presta atendimentu ne’ebé di’ak ba povu no lori ita-nia administrasaun ba di’ak liután”, nia dehan.
Nia husu ba funsionáriu públiku sira atu tau interese Estadu ba buat hotu atu servisu povu no nasaun ba futuru ne’ebé di’ak liu.
Iha fatin hanesan, Prezidente Autoridade Munisípiu Ainaro, Manuel Cortereal, agradese ba Governu sentrál tanba hili Munisípiu Ainaro hodi komemora loron nasionál Funsaun Públika públika.
“Mai ita hamutuk hodi presta servisu ne’ebé di’ak ba povu. Ha’u husu ba Ainaro oan hamutuk atu servisu Munisípiu Ainaro ho di’ak hodi fó satisfasaun ba povu ida-ne’e “, nia afirma.
Komemorasaun ida-ne’e aloka orsamentu $100.000, ho atividade mak hanesan jogu futsal entre instituisaun Estadu mane no feto, kompetisaun korál, marsa la’o tuir ain-fatin FALINTIL, misa agradesimentu no kari ai-funan iha jardin eróis pátria Ainaro.
Jornalista : Natalino Costa
Editór : Zezito Silva
