DILI, 18 jullu 2024 (TATOLI) —Durante tinan 25 investe iha Timor-Leste, East Timor Trading Group emprega ona timor-oan 200-resin no promete atu kontinua halo investimentu barak liu-tán iha nasaun ne’e.
Fundadór no Prezidente East Timor Trade Group no eis-kampiaun emprezariál Austrália-Timor-Leste, Sakib Awan hato’o kompromisu ne’e bainhira hasoru-malu ho Primeiru-Ministru (PM), Kay Rala Xanana Gusmão, iha Palásiu Governu, kinta ne’e.
“Ami iha esperansa katak projetu ne’e sei kria empregu barak. Ha’u iha nafatin kompromisu atu halo buat di’ak,” Sakib Awan hateten.
Durante enkontru, Primeiru-Ministru fó apoiu másimu ba investimentu ne’ebé empreza ne’e halo iha Timor-Leste no atualiza mós kona-bá projetu ida ne’ebé hein hela aprovasaun finál husi Ministériu Asuntu Ekonómiku ba akordu investimentu espesiál atu bele hahú konstrusaun ba projetu.
Investimentu ne’ebé empreza ne’e halo, hakarak kontribui ba kresimentu lokál Timor-Leste nian.
Nia hein katak projetu ne’e hetan naroman verde lalais atu bele hahú produsaun hodi esporta produtu Timor-Leste nian ba nasaun sira CPLP, Pasífiku Súl no Áfrika.
Emprezáriu ne’e agradese bá Primeiru-Ministru tanba fó apoiu ba investimentu iha área oioin ne’ebé tulun timoroan sira bele asesu ba kampu traballu.
Negósiu oioin husi East Trading Group durante tinan 25 iha TL mak hanesan loja East Timor Trading, Burger King, Gloria Jeans, Cheers Model no seluk tán.
Jornalista: Hortencio Sanchez
Editór: Florencio Miranda Ximenes
