Komisaun Organizadora vizita Papa Francisco relata progresu preparativu ba Xefe Estadu
DILI, 18 jullu 2024 (TATOLI)– Ekipa Komisaun Organizadór ba vizita Sua Santidade Papa Francisco, kinta ne’e, iha Palásiu Prezidensiál Bairru-Pite-Dili,relata ba Prezidente Repúblika (PR) José Ramos Horta kona-ba progresu preparatuvu durante ne’e.
“Ami mai relata progresu preparasaun vizita Amu Papa nian ba Prezidente Repúblika, Prezidente rasik mak bolu ami, ne’ebé ami hato’o kondisaun hotu ne’ebé durante ne’e ita prepara ona hanesan iha Tasi-tolu, Sentru Konvensaun Dili (CCD-sigla portugés), Katedrál inklui enkontru bilaterál iha Palásiu Prezidensiál,” Ministru Administrasaun Estatál (MAE), Tomas do Rosario Cabral, hateten ba jornalista sira hafoin ramata reuniaun ho PR Horta.
Notisia relevante:Konstrusaun altar iha Tasi-Tolu atinje ona 81%
Ministru ne’e dehan, preparasaun iha nasionál ba to’o mós iha Munisipiu hotu ne’ebé hakarak partisipa iha vizita Amu Papa.
“Iha enkontru ohin ho Prezidente Repúblika ne’e marka prezensa mós husi Prezidente Autoridade Baucau, Ainaro, Komandu Polisia Nasionál Timor-Leste (PNTL). Sira Munisipiu mai atu relata kona-ba Munisipiu nia preparasaun sira to’o ona iha ne’ebé tanba sarani barak mak hakarak partisipa. Komandu PNTL mós mai relata kona-ba kestaun seguransa nian, maibé kestaun seguransa laiha problema,” Tomas tenik.
Notisia relevante:Reabilitasaun rezidénsia madre ALMA atinje ona 98%
Nia hatutan, progresu preparasaun dadaun ne’e atinje ona 80% liu, no fiar katak to’o fulan setembru preparasaun hotu bele atinje ona 100%.
“Ba sarani sira husi Munisipiu ne’e Padre Parokia sira mak prepara, orsamentu ita haruka hotu ona ba Munisipiu sra hotu ona, hein de’it sira mak mobiliza oinsa srani sira bele mai partisipa, ne’ebé laiha kriteria, Padre sira mak organiza direita tuir kapasidade sira nian atu lori mai Dili,” nia hateten.
Tanba ne’e, Prezidente Repúblika husu ba Komisaun Organizadór atu hala’o serbisu ho másimu atu fó susesu ba vizita Papa nian durante loron loron tolu hahú 09-11 setembru.
Notisia relevante: Empreza JOVA reabilita CCD atinje ona 95%
Vizita Papa Francisco ida-ne’e nu’udar vizita Estadu dahuluk Papa Francisco mai Timor-Leste hafoin Timor-Leste restaura independénsia iha Tasi-Tolu, 20 maiu 2002, no hanesan vizita daruak hafoin Papa João Paulo II vizita Timor-Leste iha okupasaun Indonézia iha 12 outubru 1989.
Papa Francisco nia vizita pastorál ne’e sai husi Roma ba vizita uluk Jakarta-Indonézia no Papua Nova Guine, molok mai vizita Timor-Leste.
Fatin sira-ne’ebé Papa Francisco vizita durante iha Timor-Leste ne ‘e mak hanesan fatin Nunsiu Apostóliku iha Motael nu udar rezidénsia ba Papa Francisco atu hela.
Durante nia vizita ne’e Katedrál Papa Francisco sei vizita igreja Imaculada da Conceição Dili ne’ebé sei utiliza hanesan fatin atu halo sorumutu ho padre no madre sira iha Timor-Leste, hahú hosi bispu, padre, madre no selu-seluk tan.
Nune’e mós Papa Francisco sei vizita CCD hanesan fatin ba sorumutu entre Papa Francisco ho juventude Katólika iha territóriu nasionál, no sei vizita fatin istóriku Tasi-Tolu ne’ebé hili sai fatin atu atu selebra misa solene antes Papa Francisco husik hela Timor-Leste.
Papa Francisco vizita nasaun 4 iha Asia no Oseania
Tuir portál ofisial Vatican News haktuir, Papa Francisco sei hala’ o nia vizita pastorál iha Indonézia, Papua Novaguine, Timor-Leste no Singapura iha 2-13 September 2024.
Papa Francisco simu konvite hosi Xefe Estadu no autoridade Igreja atu hala’o vizita pastorál ba da-43 ba estranjeiru. Tuir oráriu, Papa Francisco sei vou hosi Roma iha 02 setembru no sei fila-fali ba Roma iha 13 setembru 2024.
Santu Padre sei hala’ o nia viajen dahuluk ba Jakarta-Indonézia, iha 03 setembru 2024 no iha Jakarta to’ o 06 setembru 2024.
Populasaun Indonézia maiória Musulmanu ne’ebé boot iha mundu no Katólika kuaze populasaun juta ualu (8) ka ekivalente 3,1%.
Hafoin ne’e, Papa Francisco sei hala’o vizita pastorál ba Port Moresby, Papua Novaguine no Vanimo iha 06-09 setembru 2024.
Populasaun iha Papua Novaguine 32% sarani Katólika ka kuaze ema hamutuk juta rua.Husi ne’eba, Papa Francisco sei vizita Dili-Timor-Leste durante loron tolu ne’ebe sei hahú hosi iha 09-11 setembru 2024. Timor-Leste maiória relijiaun Katólika ho populasaun 96% ka ema hamutuk juta ida.
Hafoin ne’e, Papa Francisco sei vizita Singapura durante loron tolu hahú hosi 11-13 september 2024. Maizumenus iha sarani Katólika hamutuk 395.000 ne’ebé hela iha Singapura ne’e reprezenta kuaze populasaun 3%.
Entretantu, Papa Francisco halo vizita pastorál mai Timor-Leste ne’e sei akompaña husi bispu no kardeál hamutuk 55 no internasionál hamutuk ema na’in-85.
Notisia relevante: Vatikanu lansa ona oráriu Papa Francisco hala’o vizita pastorál iha Timor-Leste
Jornalista: Hortencio Sanchez
Editór: Florencio Miranda Ximenes
