DILI, 21 jullu 2024 (TATOLI) – Sorumutu ordinária Konsellu Ministru (KM) komunidade Ko’alia Lian Portugés (CPLP-sigla portugés) ne’ebé realiza, foin lalais ne’e, iha São Tomé e Principé diskute liu kona-ba oinsá atu fó apoiu másimu ba joven sira iha nasaun membru atu partisipa ativu liu iha vida sustentabilidade ekonómika.
Reuniaun KM tinan-2024 ne’e hala’o ho tema prinsipál mak “Impaktu Mobilidade Juveníl iha Espasu CPLP ba Fortalesimentu Ekonomia Sustentável”.
Reuniaun ne’e Timor-Leste partisipa hosi Ministru Negósiu Estranjeiru no Kooperasaun (MNEK), Bendito dos Santos Freitas, akompañadu hosi Reprezentante Permanente Timor-Leste ba CPLP, Embaxadora Laura Abrantes, partisipa iha reuniaun ordinária KM CPLP ba dala-XXIX iha São Tomé e Príncipe.
Reuniaun Konsellu Ministru ne’e lidera husi Ministru Negósiu Estranjeiru Kooperasaun no Komunidade São Tomé e Príncipe, Gareth Guadalupe, ne’ebé hanesan Prezidente internu Konsellu Ministru CPLP ho mós Sekretáriu Ezekutivu CPLP, Zacarias Albano da Costa, no partisipa hosi Ministru Negósiu Estranjeiru husi nasaun membru organizasaun luzofóna ne’e.
Durante enkontru, ministru negósiu estranjeiru husi nasaun membru CPLP sira aprezenta planu no preokupasaun kona-ba dezafiu ne’ebé hasoru, no mós preparasaun ba interkámbiu profesionál no interkámbiu téknika atubele fahe esperiénsia ba malu entre Estadu-membru CPLP sira.
“Husi ita-nia parte Timor-Leste nian maka, ita espresa teb-tebes apoiu ba programa hotu-hotu ho kooperasaun ho Estadu-membru liu-liu ba kapasitasaun ba rekursu umanu, ita mós ko’alia kona-ba Timor-Leste nia planu asaun ba juventude nian, polítika nasionál ba empregu nian,” Ministru Bendito tenik liuhusi nota ne’ebé Agência TATOLI asesu husi media, MNEK, ohin.
Ministru Bendito hatutan tan, ida-ne’e importante tebes, tanba Timor-Leste hanesan mós membru CPLP disperse iha kontinente haat, ho nune’e mak kada Estadu membru iha ninia karaterístika espesifisidade.
“Nune’e presiza tebes formasaun, kapasitasaun orientada atubele hasa’e kbiit joven sira-nian atubele sai kompetitivu liután iha merkadu traballu,” Ministru Bendito hateten.
Bendito Freitas fó lembra katak, antes ne’e, fundamentu CPLP nian mak halo promosaun maka’as ba língua portugueza, maibé, liuhusi simeira Xefe Estadu no Xefe Governu no reuniaun Konsellu Ministru ordinaria iha Angola, deside adota ba ekonomia emprezariál ne’ebé sai hanesan forsa ida hodi motiva liután partisipasaun CPLP nian iha mundu.
“Nune’e mós Timor-Leste nia vizaun iha enkontru ida-ne’e, apela mós ba paíz membru CPLP sira, atu bele masimiza rekursu mariñu nu’udar elementu ida ba sustentabilidade ekonómika globál, atubele fó mós apoiu ba ita-nia joven sira, atu sira bele aprende, liu-liu partisipa, tanba kuaze paíz sira CPLP ne’e karaterizadu husi tasi,” haktuir Ministru Bendito.
Governante ne’e dehan, Estadu-membru CPLP sira mós preokupa ho situasaun globál funu entre Rússia ho Ukránia, Israel no Palestina inklui konflitu armada ne’ebé dadauk ne’e akontese iha Myanmar.
“Ita husi membru CPLP sira-ne’e, deklara preokupasaun ho situasaun funu sira-ne’ebé iha entre Ukránia ho Rúsia, situasaun iha Faixa Gaza ho Israel. Estadu-membru sira preokupa hela ho ida-ne’e, husu teb-tebes atu bele iha solusaun pasífiku, atubele hetan dalan ba implementasaun ba 5 pontus konsensu husi ASEAN nian,” nia tenik.
Alende ne’e, iha reuniaun Konsellu Ministru ne’e mós aprova rezolusaun ida-ne’ebé asina husi Ministru Negósiu Estranjeiru CPLP sira hodi saúda nasaun São Tomé e Príncipe ba sira-nia Prezidénsia durante tinan rua; 2023-2025, no mós iha tempu hanesan hatudu espresaun husi nasaun membru CPLP nian ba situasaun polítika globál ne’ebé iha.
Nune’e mós, iha abertura ba reuniaun Konsellu Ministru CPLP ne’e, Sekretáriu Ezekutivu CPLP, Zacarias Albano da Costa destaka kona-ba atividad servisu ne’ebé implementa ona, no halo balansu interkalar ba vizaun estratéjika foun, inklui perspetiva no dezafius ne’ebé CPLP sei hasoru no seluktan.
“Ha’u fó-sai ba Konsellu Ministru atividade sira-ne’ebé hala’o tiha ona, halo balansu interkalar ba nova vizaun estratéjika, haree dezde 2016 to’o ohin, naturalmente haree to’o rohan iha 2026 perspetivas ba futuru, dezafiu ne’ebé iha, CPLP sei enfrenta, bainhira ita hahú fali vizaun estratéjika foun ba CPLP apartir 2026,” nia hateten.
Ezekutivu ne’e akresenta, substánsia husi reuniaun Konsellu Ministru ne’e mak halo reflexaun no apresiasaun ba setór importante sira hanesan ambiente, ekonomia, edukasaun, saúde, no rekoñese katak, importánsia asinatura karta prinsípiu no direitu iha ambiente dijitál hanesan passu importante ida ba CPLP, bainhira hotu-hotu tenki servisu hamutuk hodi haree ba nesesidade atu halo transformasaun dijitál iha CPLP nian laran.
“Signifika katak, oinsá mak ita bele garante mós privasidade, protesaun dadus maibé, liu-liu fó direitu ba ema hotu-hotu hodi bele uza internet, uza meiu dijitais hodi bele hala’o dezenvolvimentu iha Estadu-membru CPLP,” Zacarias dehan.
Pontu importante seluk, eis-ministru negósiu estranjeiru no kooperasaun Timor-Leste ne’e afirma, iha nível kriasaun rede iha akordu kona-ba biodiversidade, kriasaun rede ba eskola saúde, no mós nesessidade sira seluk atu bele tuur hamutuk haree ba área kooperasaun ne’ebé la’o ladun di’ak no seluktan.
Alende ne’e, iha sorumutuk Konsellu Ministru ne’e mós, rona aprezentasaun ida husi Sekretáriu Ezekutivu CPLP kona-ba relatóriu Sekretáriu Ezekutivu nian inklui mós Diretór Ezekutivu Institutu Internasionál Língua Portugueza (IILP) nian, tanba Konsellu Ministru mak hanesan órgaun ida-ne’ebé atu halo aprovasaun ba relatóriu husi instituisaun rua referidu.
Zacarias dehan, iha ona kandidatu ba Sekretáriu Ezekutivu CPLP ne’ebé indika ona husi Angola, tanba ne’e, naran referidu Estadu membru sira sei aprezenta iha simeira Xefe Estadu no Xefe Governu ne’ebé sei hala’o iha tinan-2025 iha Guiné Bissau.
Jornalista: Hortencio Sanchez
Editór: Rafael Ximenes de A. Belo
