DILI, 29 jullu 2024 (TATOLI)–Supervizór empreza Karya Timor, Soares da Costa, hateten empreza hahú konstrui toilet públiku hitu (7) ho unidade 70 ba sarani sira–ne’ebé sei partisipa misa solene ne’ebé Papa Francisco prezide iha Tasi-Tolu, iha 10 setembru 2024, tuku 16h30 lorokraik.
Notísia Relevante: Papa Francisco sei prezide misa solene iha Tasi-Tolu iha 10 setembru
“Toilet públiku hamutuk hitu (7) maibé iha laran ne’e iha unidade ka kuartu 10 hodi ema bele uza. Ita bele dehan kada minutu lima ema 70 tama ba haris fatin,” Supervizór empreza Karya Timor, Soares da Costa, hateten ba Agência Tatoli, iha Tasi-Tolu, segunda ne’e.
Nia esplika, konstrusaun ne’e iha fatin hitu (7) mak ida konstrui iha Tasi ibun, ida iha uma adat Tasi-Tolu nian, ida iha ema faan modo nian, rua iha lagoa nian no rua sei konstrui iha estrada sorin, iha sentru konsentrasaun ba sarani sira-nian.
Ho nune’e, nai dehan, daudaun ne’e empreza hahú konstrui ona ninia aliserse ka fundasaun toilet públiku nian, iha loron lima liubá no garante atu termina mós iha fulan-agostu nia laran.
“Aliserse ba konstrusaun toilet públiku nian mak agora ita haree besi sira tau ba ne’e. Fatin ne’e ita book daudaun ona,” nia dehan.
Responsável ne’e hateten, empreza mós hahú harii alisersei ba projesaun ekran ka layar boot ba transmisaun direta misa solene ne’e ba sarani sira iha fatin importante lima iha área Tasi-Tolu.
“Ami komesa harii aliserse ekran ba transmisaun nian. Ha’u la sala iha ekran hitu ka ualu, maibé ami hahú fui oa nia aliserse,” nia hateten.
Iha fatin seluk, Tekniku Ajensia Dezenvolvimentu Nasionál (ADN), Francisco Xavier, hateten Governu no igreja prepara ekran hamutuk 10 hodi monta iha fatin sira Papa ba enkontru ho sarani sira.
“Ekran ne’e boot ne’e sei monta ualu iha Tasi-Tolu no ida iha Katedrál no ida iha Sentru Konvensaun Díli atu fasilita sarani, foinsa’e no padre-madre sira iha enkontru ho amu Papa,” nia dehan.
Obra fízika ba preparasaun vizita Papa nian atinje 80%
Entretantu, nia informa total obra fízika kompostu hosi obra reabilitasaun no konstrusaun foun ba preparasaun vizita Amu Papa Francisco nian durante loron tolu hahú husi 09-11 setembru 2024 iha Timor-Leste ne’e atinje ona 80%.
“Konstrusaun fízika ba preparasaun sua santidade Francisco nian até agora ita atinje ona 80% husi fatin hotu-hotu ne’ebé sua santidade Papa sei vizita,” Francisco Xavier hateten ba jornalista sira iha Motael.
Francisco Xavier explika, fatin sira-ne’ebé amu Papa atu liu no vizita ne’e mak hahu husi Aeroporto Internasionál Nicolau Lobato Díli, Palasiu Prezidensiál, Sentru Konvensaun Díli, Katedral, rezidénsia Madre ALMA no Tasi-Tolu.
Tekniku ne’e hateten, sei iha fulan ida atu konstrutór sira termina obra konstrusaun sira-ne’ebé agora la’o hela atu atinje ba 100%.
“Ekipa lojistika Governu no igreja nian fiar katak durante fulan ida mai tan ne’e ita atinje 100% husi obra sira-ne’e hodi hein vizita sua Santidade nian mai Timor-Leste,” nia dehan.
Notísia Relevante: Membru koru 1.100 partisipa misa solene Papa Francisco prezide iha Tasi-tolu
Jornalista : Jesuína Xavier
Editór : Cancio Ximenes
