Reabilitasaun sala VIP iha aeroportu Nicolau Lobato Comoro atinje ona 80%
DILI, 29 jullu 2024 (TATOLI)–Enjiñeiru Empreza Dco Unipesoál, Lda, Constantino Mendonça, hateten progresu obra reabilitasaun ba uma ka sala Very Important Person (VIP) iha aeroporto Internasionál Prezidente Nicolau Lobato Comoro, Dili, atinje ona 80%.
Notísia Relevante: Vatikanu lansa ona oráriu Papa Francisco hala’o vizita pastorál iha Timor-Leste
Nia hateten, molok halo reabilitasaun ba sala VIP ne’e, empreza halo konstrusaun foun ne’e prontu ona 100% hodi uza ba serbisu aero nian atu substitui sala VIP ne’ebé sira hadi’a.
“Agora sira uza sala ne’e ba serbisu no ami hahú reabilita sala ida-ne’e tuir persentajen hanesan daudaun ne’e,” Enjiñeiru Empreza Dco Unipesoál, Lda, Constantino Mendonça, hateten ba Agência Tatoli, iha Aeroportu Internasionál Prezidente Nicolau Lobato, Comoro, domingu (28 jullu 2024).
Serbisu reabilitasaun ba sala VIP aeroportu Comoro agora la’o hela no daudaun ne’e trabballadór sira komesa monta plafon uma kakuluk nian, ne’ebé dala ruma sei konklui iha semana oin.
Tuir nia, serbisu ida tan mak sei nahe fali tapeti foun ba iha sala VIP nian ne’ebé sobu tiha ona, hodi halo reabilitasaun ba uma ne’e.
“Ami sei hamoos fila-fali goma ka kola iha azulezu ne’e hodi taka fali tapeti (karpet) foun, maibé azulezu tuan ne’e manten nafatin,” nia hateten.
Husu kona-ba konkluzaun obra reabilitasaun tuir prazu determinadu, enjiñeiru ne’e hatán, empreza garante reabilitasaun ne’e sei konklui iha fulan-agostu ne’e.
“Empreza hahú halo konstrusaun no obra reabilitasaun ne’e iha fulan-marsu 2024 no sei termina iha fulan-agostu tuir kontratu ne’ebé iha,” nia dehan.
Notísia Relevante: Governu sei reabilita uluk salaun VIP no monta iluminasaun Aeroportu Comoro
Jornalista : Jesuína Xavier
Editór : Cancio Xomenes
