BOBONARO, 01 agostu 2024 (TATOLI) – Autoridade munisipál Bobonaro ho vigáriu jerál Dioseze Maliana no amu pároku sira, kinta ne’e hala’o enkontru daruak hodi diskute kona-bá preparasaun atu partisipa misa iha Tasi-Tolu, Dili, iha fulan-setembru ne’ebé prezide direita hosi Santu Papa Francisco.
Segundu Vise Koordenadór Jerál ba Komisaun Organizadóra vizita Sua Santidade Papa Francisco hosi Munisípiu Bobonaro atuál Vigáriu Jerál Dioseze Maliana, Padre Lucio Norberto de Deus, esplika, Dioseze Maliana tarjetu sei mobiliza sarani sira iha munisípiu Bobonaro purvolta rihun 20 atu partisipa misa solene iha Tasi-Tolu.
Nia dehan, preparasaun ne’ebé daudaun ne’e Dioseze Maliana halo mak hanesan halo formasaun ba sarani sira atubele koñese Amu Papa, ninia servisu no istória sira.
Nune’e mós parókia neen halo ona rejistrasaun ba sarani sira-ne’ebé tuir dadus provizóriu iha ema na’in-400 hahú rejita ona iha komisaun.
“Haree ba fatin ne’ebé prepara iha Tasi-Tolu ne’e limitadu, depois haree mós atu fasilita sarani sira ba ne’e, maibé ha’u-nia tarjetu Parókia Maliana ne’e hatún purvolta rihun 10, maizumenus ami husi Bobonaro bele hetan rihun 20, maibé hanoin hela mak ne’e, sé hatún hanesan ne’e tenke prepara kamioneta ne’e 200,” Padre ne’e ko’alia iha salaun Maria-Tapo.
“Ami simu informasaun husi Dioseze Atambua sira sei mai purvolta rihun 10, ne’ebé sira sei koordena ho migrasaun, buat sira-ne’e, depois ita-nia Polísia sira mós sei akompaña sira,” nia katak.
Koordenadór Jerál Komisaun Organizadora vizita Papa Francisco atuál Prezidente Autoridade Munisípiu Bobonaro, Alexandrino Pires, konfirma munisípiu Bobonaro hetan alokasaun orsamentu husi Komisaun nasionál hamutuk rihun $40 hodi partisipa iha misa solene ne’e.
Munisípiu Bobonaro hetan alokasaun orsamentu husi komisaun nasionál rihun $40 hodi partisipa iha misa solene ne’e, hodi ezekuta ba transporte, lojístika, saúde no seguransa.
“Ita hetan alokasaun osan rihun $40, osan ne’e sei distribui ba komisaun iha nível postu bazea ba sira-nia númeru rejistu iha Igreja, osan ne’e barak liu ba suku ne’ebé barak agora daudaun postu Bobonaro iha suku 18, tuir fali mai Maliana tanba ne’e sentru, depois Atabae suku haat, Balibo suku neen ne’e sei ladún boot ida,” nia katak.
“Iha fatin tentiva rua, ida amu vigaria jerál ko’alia ho autoridade Liquiçá katak iha Kaitehu, alende husi komisaun nasionál prepara fatin ba munisípiu Bobonaro iha Tibar, agora desizaun finál orsida hamutuk iha Kaitheu ka tuir planu nasionál,” nia katak.
Komandante PNTL Munisípiu Bobonaro, Superintedente Xefe Agunstino Gomes da Silva, hateten autoridade seguransa prontu apoia rekursu hotu-hotu hodi garante seguransa ba sarani sira-ne’ebé iha rai-laran no mos husi NTT.
“Ita-nia Ofisiál Polísia Suku (OPS) sei koordena ho líder komunitária, komandu eskuadra sei koordena ho amu pároku, administradór postu sira, atubele mobiliza ita-nia pereigrinu sira husi postu mai munisípiu, ita sei hamutuk ba estadia iha Liquiçá,” nia katak.
Notísia relevante: Vizita Papa Francisco, PNTL Bobonaro sei kontrola transporte ho rigorozu
Jornalista : Sérgio da Cruz
Editór : Evaristo Soares Martins
