DILI, 09 agostu 2024 (TATOLI)–Reprezentante Vatikanu iha Timor-Leste, Núnsiu Apostóliku, Monsenór Marco Sprizzi, husu ba sarani sira hodi bele rona no kanta muzika ne’ebé hakerek no lansa husi artista timoroan sira ho titulu “Hein Santo Padre” hodi simu Papa Francisco hala’o vizita pastorál iha Timor-Leste.
Notísia Relevante: Governu-Igreja ofisialmente lansa múzika “Hein Santo Padre”
Monseñor Marco Sprizzi hateten, muzika ne’e espresaun ba preparasaun ba sarani sira oinsá atu bele simu Papa Francsico, tanba artista sira iha inisitiva di’ak hodi bele ajuda fó mensajen furak ba preparasaun fiar sarani-nian liuhosi múzika.
“Múzika furak loos hanesan ha’u ko’alia ba sira seluk, katak ida-ne’e atu hafanu entuziasmu sarani timoroan hotu ba iha preparasaun vizita Santu Padre nian mai Timor-Leste,” Reprezentante Vatikanu iha Timor-Leste Núnsiu Apostóliku, Monsenór Marco Sprizzi, hateten ba Agência Tatoli, hafoin halo lansamentu ba múzika “Hein Santo Padre”, iha Palásiu Prezidensiá Nicolau Lobato, Bairru Pite.
Reprezentante Vatikanu ne’e hateten, iha konteúdu múzika ida-ne’e relasiona ho tema vizita pastorál sua santidade Papa Francisco nian mai Timor-Leste.
“Sira eskolla di’ak-liu no furak loos ba preparasaun vizita Santu Padre nian, tan ne’e mak ha’u enkoraja sarani sira hotu atu bele kanta hamutuk,” nia hateten.
Notísia Relevante: Artista timoroan 36 hakerek múzika “Hein Santo Padre” ba Papa Francisco
Jornalista : Jesuína Xavier
Editór : Cancio Ximenes
