DILI, 09 agostu 2024 (TATOLI)—Estabelesimentu ensinu privadu, Universidade da Paz (UNPAZ) no Universidade Dili (UNDIL) aposta nia kualidade rekursu umanu liuliu dosente sira liuhusi hasa’e grau akadémiku mestradu no doutoromentu iha rai-laran no mós rai-li’ur.
UNPAZ nia dosente hamutuk 52 mak kontinua estudu ba nível doutoramentu iha Atlantic International University iha Estadu Unidus Amérika, Malázia, Filipina, Indonézia no balun iha UNPAZ rasik.
“Husi 2009 to’o mai agora ami halo investimentu ba rekursu umanu ne’e maka’as. Daudaun ne’e doutoramentu iha UNPAZ ne’e 48, agora ida-ne’ebé mak kontinua ba doutoramentu iha rai -li’ur ne’e hamutuk 52. Ne’ebé, husi 52 ne’e balun peskiza ona, hakerek proposta, balun sei tuir hela prosesu aprendizajen,” Reitór UNPAZ, Adolmando Amaral, informa ba TATOLI, iha knaar fatin UNPAZ Osindo I, Dili, sesta ne’e.
Reitór UNPAZ, Adolmando Amaral, hateten, sira kontinua haruka dosente ba kontinua estudu iha rai-li’ur ne’e tanba tuir polítika universidade nian ne’e tinan oin tenke iha doutoramentu hamutuk 100.
Nia hatutan, dosente iha UNPAZ – universidade ne’ebé harii iha tinan-2002, ne’ebé hanorin matéria espesializada ne’e lisensiatura la iha mesak maestradu no doutoramentu, lisensiatura ne’e ba iha língua de’it ne’ebé mak UNPAZ kontratu sira husi rai-li’ur.
“Tanba ne’e kona-ba rekursu umanu ami laiha problema. Nune’e mós investimentu ba rekursu umanu ba maestradu no doutoramentu ne’e universidade mak investe la’ós Governu, tanba ami hatene ami harii universidade ami iha obrigasaun haruka ami-nia dosente sira ba kontinua nia estudu,” nia hateten.
Totál dosente iha ensinu superiór ne’ebé ho vizaun ‘Atu sai hanesan Sentru Estudu Sientífiku no Aprendizajen, Peskiza, Kreativu, Inovativu, ho Karakter Emprezáriu Nível Mundiál no Kontribui Impaktu Bo’ot ba Nasaun, ne’e nia dosente hamutuk na’in-411.
Estudante ativu hamutuk rihun-16, fakuldade iha neen mak Fakuldade ekonomia, direitu, siénsia sosiál no umana, saúde públika no siénsia médika, enjeñária no teknolojia agríkola. Departamentu hamutuk 21 ba nível lisensiatura, nível mestradu sia no doutoramentu rua.
Dosente UNDIL kontinua estudu mestradu no doutoramentu iha Portugal
Enkuantu, Vise-reitór Asuntu Administrasaun Jerál no Rekursu Umanu UNDIL, Tomas Augusto Correia, informa, daudaun ne’e dosente UNDIL nian na’in-10 mak hala’o hela estudu iha portugal hodi hasai maestradu no doutoramentu.
“Tinan kotuk ne’e ita koopera ho fundu dezenvolvimentu kapitál umanu (FDCH) hodi fó bolsu estudu ba ita-nia dosente na’in-10 ba portugal hodi kontinua sira-nia estudu, sira na’in-10 ne’e na’in rua hasai doutoramentu no na’in ualu hasai maestradu,” vise-reitór dehan.
Bolseiru sira ne’ebé hetan bolsu estudu husi FDCH ba kontinua estudu iha Portugal, antes ne’e sira tuir kursu lian portugés durante tinan-ida hafoin sira tuir teste no sira pasa.
“Fundu ba Bolseiru sira ne’e mai husi Governu liuhusi FDCH. Bolseiru sira ne’e balun ba tinan-rua no balun ba tinan-tolu,” nia dehan.
Akadémiku ne’e hatutan, UNDIL mós iha planu ba tinan ida-ne’e sei haruka tan dosente na’in-neen ba kontinua iha Indonézia hodi hasa’e sira-nia kapasidade no esperiénsia atu nune’e fila mai sira bele kontinua hanorin estudante sira iha universidade.
“Ami iha planu ba tinan ida-ne’e atu haruka tan bolseiru na’in-neen ba Indonézia. No sira na’in-neen iha área edukasaun, ekonómia, siénsia polítika no direitu”, nia tenik.
Jornalista: Osória Marques
Editór: Rafael Ximenes de A. Belo
